“Өдрийн сонин”-ыхон нэг өдрийн цалингаа Ж.Жаргалсайханы эмчилгээнд хандивлалаа

2019 оны 09-р сарын 20 өдөр, 09 цаг 42 минутад нийтэлсэн (Сэтгэгдэл үлдээх )
jagaa ayan

Сэтгүүлч Ж.Жаргалсайханд туслах “Жаргалын мод” хандивын аянд “Өдрийн сонин”-ы хамт олон нэгдэж, нэг өдрийн цалингаа хандивлалаа. Үзэг нэгт сэтгүүлч бүсгүй маань эрүүл болж, үр хүүхэдтэйгээ жаргалтай амьдрах тэр сайхан өдрүүдийн төлөө Монголын хэвлэл мэдээллийн байгууллагын редакци, сэтгүүлчид ч мөн хандивын аянд нэгдээрэй.

“Нэгнээ харсаар байж үхүүлэх шиг аймшиг хүн төрөлхтөнд байдаггүй” хэмээн манай сонин бичиж байлаа. Шинжлэх ухаан шинэ түвшинд гарч, ямар ч өвчнийг эмчлэх заавар зөвлөгөө нь бэлэн байсаар байтал бид “мөнгөгүй” гээд өвчний өмнө өвдөг сөхрөөд суух нь хэтэрхий эмгэнэлтэй хэрэг. Монголын төр даатгалын мөнгийг фитнесст зарцуулж тансаглаж суухаар өвдөж зовсон хэдэн монголчуудаа эмчлүүлэх арга гарц хайж олоосой. Эмчилгээний сан байгуулаасай. Эрүүл мэндийн салбарт шинэчлэл хийх цаг нь болсон хэмээн бид бичиж байлаа.

Одоохондоо манай төрд бидний төлөө ийм гарц хайж, бодлого боловсруулах сөхөө алга, гарын үсгийн аянд харайлдаж байна. Тиймээс бид бие биедээ найдаж, хандив цуглуулахаас өөр арга алга. Олны тус оломгүй далай гэдэгчлэн сайхан сэтгэлт хүмүүс, байгууллага “Жаргалын мод”-нд өглөг буяны гараа сунгаж байгаад талархал илэрхийлье. Ж.Жаргалсайханы биеийн байдал нь хүнд байгаа тул БНСУ руу үе шаттай эмчилгээнд явах шаардлагатай болоод байгаа юм.Түүнд тохиолдсон энэхүү өвчин нь эдгэршгүй бөгөөд эмчилгээнд явснаараа өвчний явцыг нь удаашруулах, насжилтыг нь уртасгах, биеийн ерөнхий байдал сэргэвэл бөөр солиулах хүртлээ үргэлжлэх юм байна. Мөн удаан хугацаанд эмчилгээ хийлгэх шаардлагатай. Тиймээс энэхүү хандивыг манай хэвлэлийнхэн, сэтгүүлчид маань цааш нь түүчээлэн дэлгэрүүлээрэй.

Хандивын данс: Ж.Жаргалсайхан-Хаанбанк 5076 114356,

Төрийн банк-105 700 275109

jagaa ayan

Танд таалагдаж байвал LIKE хийгээрэй. Баярлалаа

АНХААРУУЛГА: Уншигчдын бичсэн сэтгэгдэлд ОНЦЛОХ.МН хариуцлага хүлээхгүй болно. ОНЦЛОХ.МН сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.