Шалгалтын нууцыг задруулсан багшийн толгойг илээд зүгээр л “Баяртай” гэх үү

Энэ сарын 25-нд болсон 12 дугаар ангийн математикийн шалгалт хүчингүй болов. Хариуцлагагүй багшийн балгаар улсын шалгалтын дүн хүчингүй болсон нь энэ. Багш,сурагчдын хэдэн цагийн хөдөлмөр ийнхүү талаар болов. Нийслэлийн Чингэлтэй дүүргийн 49 дүгээр сургуулийн сургалтын менежер П.Өлзийхишиг нь нууцлалын баталгаа гаргасан үүрэг, хариуцлагаа зөрчиж багш хүний ёс зүйн хэм хэмжээг уландаа гишгэжээ.

Тэрээр шалгалтын сэдэв даалгаврыг шалгалт эхлэхээс өмнө задалж, олон нийтийн цахим хэрэгслээр тарааж багш хүнд үл зохих ёс бус үйлдэл гаргасан нь тогтоогдсон байна. Иймээс Боловсролын үнэлгээний төвөөс энэ өдрийн 12 дугаар ангийн математикийн шалгалтыг хүчингүйд тооцож 2017 оны 05 дугаар сарын 30-ны өдрийн 12.00 цагаас дахин авах болсныг мэдэгдэв. Ийм утга учиргүй үйлдэл хийсэн П.Өлзийхишигт хариуцлага тооцож ажлаас нь халжээ.

Түүнийг ажлаас халаад явуулах нь ч явууллаа. Уг нь хуулийн дагуу ямар нэгэн хариуцлага хүлээлгэх ёстой. Наад зах нь багш нарын ажилласан цалинг төлүүлэх хэрэгтэй. Сурагчдын мэдлэгээ шалгуулсан сэтгэл,зүтгэлийг хүндлээгүй П.Өлзийхишиг “Уучлаарай” ч гэхгүй өнгөрөх үү. Энэ багшид монгол хүний жудаг алга.

Улсын шалгалтыг зохион байгуулахад Боловсролын үнэлгээний төвөөс шалгалт зохион байгуулах удирдамж, шалгалттай хичээл бүрээр сэдэв, даалгаврыг боловсруулж, тухайн аймаг, орон нутаг, дүүргийн БСУГ, БХ-ийн дарга нартай нууцлалын гэрээ байгуулж, улмаар сургууль бүрийн ахлах ангийн менежерүүдээр нууцлалын баталгаа гаргуулан ажилладаг журамтай.

Шалгалтын сэдэв даалгаврыг тухайн шалгалт эхлэхээс 2 цагийн өмнө БСШУСЯ-ны боловсролын мэдээллийн нэгдсэн систем /www.esis.mn/ -д байршуулан, зөвхөн нууцлалын баталгаа гаргасан сургалтын менежерүүд тусгай эрхээр татан авч, тухайн сургууль өөрөө улсын шалгалтыг зохион байгуулж, сурагчдын дүн оноог боловсролын мэдээллийн нэгдсэн системд шивж оруулна.

Гэтэл хууль мэт ийм дүрэм журмыг үл тоомсорлосон багшийн толгойг илээд “Баяртай” гэх арай л биш ээ
Н.Намуунаа