Хаалганы цаана үйлддэг гэр бүлийн хүчирхийлэл гэх гэмт хэрэг буурчээ

Улсын хэмжээнд энэ оны эхний найман сард гэр бүлийн хүчирхийллийн улмаас үйлдэгдсэн гэмт хэрэг 783 бүртгэгджээ. Энэ нь өмнөх оны мөн үеэс 152-оор бурсан үзүүлэлт юм гэж ЦЕГ-ын Урьдчилан сэргийлэх хэлтсээс мэдээллээ. Гэр бүлийн хүчирхийлэлтэй тэмцэх тухай хуулийг хэрэгжүүлж эхэлснээс хойш гэр бүлийнхэндээ агсам согтуу авир гаргаж, дарамт учруулсан 1329 хүнийг баривчилж, зан үйлд нөлөөлөх албадан сургалтанд хамруулсан байна. Эдгээр иргэдээс 98 хувь нь  дахин зөрчил гаргаагүй аж. Энэ бол зөвхөн нийслэлийн хэмжээнд бүртгэгдсэн баримт юм.

Зөрчлийн тухай хуулийн 5.4 дүгээр зүйлд “Гэр бүлийн хүчирхийллийн шинжтэй зөрчил үйлдсэн бол 7-30 хоногийн хугацаагаар  баривчлах шийтгэл ногдуулна” гэж заасан. Гэр бүлийн хүчирхийлэлтэй тэмцэх тухай хуулийн 23 дугаар зүйлд “Бүх шатны боловсролын байгууллагын багш, эмнэлгийн мэргэжилтэн, нийгмийн ажилтан, хүүхдэд үйлчилгээ үзүүлж байгаа байгууллага, ажилтан хүүхдийн эсрэг хүчирхийлэл, гэр бүлийн хүчирхийллийн талаар цагдаагийн байгууллагад, цагдаагийн алба хаагчийн эзгүйд сум, багийн Засаг даргад болон хүүхдэд яаралтай тусламж үзүүлэх /107, 108/ утасны үйлчилгээнд мэдээлэх үүрэгтэй” гэж заасан байдаг. Энэ төрлийн гэмт хэргийн  86.5 хувь  нь гэр, орон сууцанд буюу хаалттай хаалганы цаана үйлдэгддэг. Тиймээс иргэд энэ талаарх мэдээ, мэдээллийг цагдаагийн байгууллагад ирүүлэх нь гэр бүлийн хүчирхийллийг илрүүлэхэд чухал ач холбогдолтой гэж цагдаагийн байгууллагаас анхаарууллаа.