Хөвсгөлийнхөн жорлонгийн нээлт хийж тууз хайчилжээ

Манайхан  хөгийн юмыг мөн ч их сэдэх юм даа. Хөвсгөл аймгийн Хатгал тосгонд баахан дарга нар зорин очиж жорлонгийн нээлт хийж улаан тууз хайчилжээ. Аялал жуулчлал хөгжиж байгаа гэх Хөвсгөлд жорлонгийн асуудал маш хүнд. Монголыг зорьж ирсэн гадаадынхан байгалийн 00-д “морь харах” гэж  үйлээ бардаг нь нууц биш. Гадаад дотоодын аялагчдыг хүнд байдлаас гаргахын тулд боловсон жорлон байгуулж байгаа хоймор нутгийнханд талархая. Жорлон хэрэгтэй юу гэвэл маш хэрэгтэй. Харин тэр тууз дарга нар юу ч билээ, ёстой илүүджээ.

Хэдэн урц,хэв загвар муутай модон байшин барьчихаад аялал жуулчлал хөгжүүлж байна гэж хийрхдэг дарга нар жорлон барьж байгуулах тууз хайчлах ажилдаа ямар их ач холбогдол өгнө вэ. Гадныхныг модны ёроолд суугаад “морь хар” гэснээс арай дээр юмаа даа, янз нь. Хятадууд Эрээнийг хөгжүүлэхийн тулд хамгийн эхлээд дэд бүтцээ шийдсэн юм гэн билээ. Манайхан Хөвсгөлийг аялал жуулчлалын төв болгохоо жорлонгийн нээлт хийж тууз хайчлахас ийнхүү эхлэвэй.  Хөвсгөлд очсон жуулчдад цаа буга,цаатангуудын отог, гар хийцний сав суулга, тайгын амьдрал үзүүлээд буцаадаг байсан бол одоо шинэхэн боловсон жорлонгоор үйлчилдэг болох нь дээ. Улаан тууз хайчилсны ашиг гарах нь дамжиггүй.

Н.Дөл