Ц.Элбэгдоржийг алтан зоосонд мөнхжүүлсэн нь ямар учиртай бол

Сүүлийн жилүүдэд алтны компаниуд,хувиараа алт ухдаг нинжанууд Монгол орноо улаан тоос болтол ухаж байна. Үүний үр дүнд Монголбанкинд тушааж байгаа алтны хэмжээ нэмэгдсээр байна.Өнгөрсөн жил 18 тн алт Монгол банкинд тушаасан бол энэ оны эхний найман сард 11.3 тн алт тушаасан байна. Энэ их алтыг Монгол Улсын эрдэнэсийн санд хадгалж байдаг юмсанж. Тэр их эрдэнэсийн сангийн захирал П.Эрдэнэтуяа нь Монгол Улсын Ерөнхийлөгч асан Ц.Элбэгдоржийн бэр гэнэ. Монголбанкны Эрдэнэсийн санд  НТӨ I мянганаас – XII зууны үеийн археологийн олдворууд, Монголын эзэнт гүрний үед холбогдох алт, мөнгөн зоос болон мөнгөн дэвсгэрт, XVII-XX зууны эхэн үеийн монголчуудын оюуны болоод эдийн соёлыг илэрхийлэх эд хэрэглэгдэхүүн, Монгол улсын хаан VIII Богд Жавзандамба хутагт болон Улсын эх дагина Дондогдуламын хэрэглэж байсан эд зүйлс, төрийн тамга, алтан өргөмжлөлүүд, Монгол Улсын төрийн дээд одон тэмдэг зэрэг Монгол Улсын хосгүй болон үнэт үзмэрүүд, мөн Монгол Улсын гүйлгээний түүхэн мөнгөн тэмдэгт, Монголбанкнаас эрхлэн гаргасан дурсгалын зооснууд хадгалагдаж байдаг ажгуу. Эрдэнэсийн сангийн захирлын ярьснаар, тус сангийн зарим эд зүйлсээс үзмэрийн танхимуудад байршуулж, иргэд байгууллагуудад хосгүй эдлэлүүдийг танилцуулж, сурталчилдаг аж. Хурааж цуглуулсан алт эрдэнэсээр дурсгалын зоос гаргах ажлыг бэр бүсгүй хариуцдаг болохоор хэнийг зоосонд мөнхжүүлэх вэ гэдгийг ч бас мэддэг байх нь. Монгол улсынхаа  мөнгөөр Герман улсад Ц.Элбэгдоржийн зурагтай  5000 ширхэг дурсгалын зоос хийлгэжээ.

Тэдгээр зоосны ганцхан ширхэг нь 85 еврогийн үнэтэй  гээд бодохоор  5000 ширхэг зоос ямар үнэтэйг тооцчихож болно л доо. Тэр их алтан зоосыг  гүйлгээнд гаргах уу,эсвэл Элбэгдоржийг шүтэн бишрэгчид дэрэн дороо хадгалах уу гэдгийг уран бэрийн ухаант  Эрдэнэтуяа мэдэх байх. Уг нь дурсгалын зоос гэдэг нь Монгол Улсын болон олон улсын нийтлэг ач холбогдол бүхий  тэмдэглэлт ой зэрэг онцгой чухал  үйл явдлуудад зориулан гаргаж буй үнэт металлаар үйлдвэрлэгдсэн тэрхүү онцгой үнэт зоосыг хэлдэг гэнэ билээ.

Монгобанкнаас захиалан хийлгэсэн дурсгалын зоосны ар талд заавал Монголбанкны нэр, бэлгэдэл  байдаг учиртай. Энэ жил Монголбанкны санаачилгаар 9 төрлийн дурсгалын зоос гаргасан байна. Үүнд “Богд хаан”, “Мазаалай”, “Их жанжин Д.Сүхбаатар” тэгээд бас Ц.Элбэгдоржид эрхэмлэн зориулсан алтан зоос гаргасан нь энэ юм.