Монгол банкинд тушаасан алт 17 тонн болсон байна

Монгол банкны мэдээлснээр,сүүлийн нэг жилийн хугацаанд Монгол Улсын гадаад валютын албан нөөц тогтмол өсөж байгаа аж. Энэ сарын байдлаар гадаад валютын албан нөөц 2 тэрбум доллараас давжээ. Тэгсэн атал ноён долларын ханш чангараад,ард түмэн чирэгдээд байхын учрыг олоход бэрх.

Монгол банкны сэтгэл сэргээсэн мэдээг анзаарвал,экспортын зарим гол нэр төрлийн бүтээгдэхүүн тэр дундаа зэс, нүүрсний үнэ олон улсын түүхий эдийн зах зээл дээр өссөнөөр Монгол Улсын экспортын хэмжээ 2017 оны 9-р сард 4,313.1 сая ам.долларт хүрч өмнөх оны мөн үеэс 32.0 хувиар өссөнөөр гадаад худалдааны нийт тэнцэл сайжирчээ Олон улсын валютын сантай хамтарч хэрэгжүүлж байгаа Өргөтгөсөн санхүүжилтийн хөтөлбөрийн хүрээнд нэг талаас Монгол Улсад итгэх хөрөнгө оруулагчдын итгэл нэмэгдэж, эдийн засагт ирэх дарамт буурсан. Энэ хөтөлбөрийн хүрээнд тохирсон 5.5 тэрбум ам.доллараас эхний шатны санхүүжилтүүд орж ирсэн зэрэг сайн үр дүн байгаагаас  манай улсын валютын нөөц өссөн байна.

Түүнчлэн валютын нөөцөд хамгийн их нөлөө үзүүлдэг зүйл бол алт тушаалт, худалдан авалт юм.   Иргэд аж ахуйн нэгжийн Монголбанкинд тушааж буй алтны хэмжээ нэмэгдэж өнөөдрийн байдлаар 17 тоннд хүрсэн нь өмнөх оны мөн үеэс 8 хувь нэмэгджээ. Монголбанкнаас Хятадын Ардын банктай хийсэн 15 тэрбум юанийн своп хэлцлийн хугацааг гурван жилээр сунгаж, эргэн төлөх хугацаа нь дуусаж байгаа бондуудын эргэн төлөлтийг шийдвэрлэснээр Монгол Улс 2021 он хүртэл гадаад төлбөрийн эргэн төлөлтийн эрсдэлээс сэргийлэх нөхцөл бүрдсэн гэж Монгол банкнаас мэдэгдэж байна.