Элэг,бөөр шилжүүлэн суулгах Монголын мэс засал дэлхийн түвшинд хүрсэн

Улсын нэгдсэн төв эмнэлгийн эрхтэн шилжүүлэх мэс заслын багийнхан жилээс жилд дэлхийн төвшинд хүрсэн чанартай эмчилгээ үйлчилгээ үзүүлж, олон хүний амь нас аварч  олны талархлыг хүлээж байдаг билээ. Бөөр,элэг шилжүүлэх мэс заслын чадварлаг,туршлагатай эмч нар 2018 онд 25 хүнд элэг, 23 хүнд бөөр шилжүүлэн суулгахаар төлөвлөжээ. Элэг шилжүүлэн суулгах багт мэс засалч, мэдээгүйжүүлэгч, нойрсуулагч, эрчимт эмчилгээнийхэн, элэгний эмч нар, лабораторийн эмч нар, хагалгааны болон эрчимт эмчилгээний сувилагч нар, дүрс оношилгооныхон, эрдэм шинжилгээний гэсэн багууд хамтран ажилладаг байна.  Хамтарсан багийнхан  нэг удаагийн мэс засал хийхдээ нийт 40 гаруй хүний бүрэлдэхүүнтэй 20 гаруй цаг хамтран ажиллаж байж элэг шилжүүлэх мэс заслыг хийдэг. Мөн элэг шилжүүлэн суулгах мэс заслын үед УНТЭ-ийн эмийн сан, инженер техникийн алба гээд бүгд бэлэн байдалд нэгдэн ажилладгийн үр дүнд хүний алтан амийг авардаг. Монгол Улсын хэмжээнд жилдээ 300 гаруй хүн гадаадын улс оронд эрхтэн шилжүүлэх мэс засал хийлгэхээр зорьдог байсан бол сүүлийн жилүүдэд энэ тоо багасчээ. .

Ганц баримт дурдахад,элэгний донор болж байгаа хүн нь залуу бас эрүүл байх ёстой. Элэгний донороос гуравны хоёр хэсгийг нь авч, донортоо гуравны нэгийг нь үлдээдэг байна. Тухайн донор болсон хүн мэс засал хийлгэснээс гурван сарын дараа гэхэд элэгний 80 хувь нь төлжиж, нэг жилийн дотор элэг бүрэн төлждөг.

Харин элэг шилжүүлэн суулгасан  хүн насан туршдаа хяналтад байх хэрэгтэй. Эхний нэг жилийн хугацаанд байнгын хяналтад байна. Харин нэг жилээс хойш гурван сар тутамд, таван жилээс хойш зургаан сар тутамд, 10 жилээс хойш жилд нэг удаа үзлэгт хамрах шаардлагатай байдаг аж.