”Elite MUN” загвар хуралдаан боллоо

“Улаанбаатар Элит” олон улсын дунд сургуулийн Elite MUN бүлгэмийн сурагчид Нэгдсэн Үндэстний Байгууллагын загвар хуралдааныг энэ сарын 3, 4-ний өдрүүдэд сургууль дээрээ анх удаа амжилттайгаар зохион байгууллаа. Энэхүү загвар хуралд нийслэлийн зарим дунд сургуулиудаас гадна Баян-Өлгий, Орхон, Дархан-Уул аймгаас нийтдээ 159 сурагч НҮБ-ын гишүүн орны төлөөлөгчийн статустайгаар, 25 сурагч зохион байгуулагч гишүүнээр тус тус оролцсон юм.

Оролцогч сурагч, хүүхдүүд маань НҮБ-ын дэргэдэх дараах таван салбар байгууллагуудад хуваагдан тус бүрдээ тодорхой сэдвийн хүрээнд чуулан илтгэл тавьж, хэлэлцүүлэг өрнүүлэв.

Загвар хуралдаанд НҮБ-ын дэргэдэх ЮНЕСКО (Нэгдсэн Үндэстний Байгууллагын боловсрол, шинжлэх ухаан, соёлын байгууллага)-д хамрагдсан хүүхдүүд “Дэлхийн соёлын өв болсон газрууд уур амьсгалын өөрчлөлтөд өртөж буй нь” сэдвээр, UNHRC (НҮБ-ын Хүний эрхийн хороо)-д харьяалалтай сурагчид “Дижитал эрин дэх нууцлалыг хадгалах эрх” сэдвээр, UNSC (НҮБ-ын Аюулгүй байдлын зөвлөл)-д орсон төлөөлөгчид “Эмэгтэйчүүд, энх тайван ба аюулгүй байдал” сэдвийн хүрээнд, UNICEF (НҮБ-ын Хүүхдийн сан)-д харьяалалтай төлөөлөгч хүүхдүүд “Мансууруулах бодисын худалдаанд хүүхдүүдийг татан оролцуулж, ашиглах явдлыг таслан зогсоох нь” сэдвийн, WHO (Дэлхийн эрүүл мэндийн байгууллага)-д хуваарилагдсан сурагч, хүүхдүүд “Эрүүл мэндийн хар зах зээл” гэсэн сэдвүүдээр тус тус чуулсан билээ.

Мөн энэхүү үйл ажиллагаанд Unread сайтыг үүсгэн байгуулагч А.Ундрал, НҮБ-н Залуучуудын зөвлөх хорооны зохицуулагч Н.Халиун нар хүндэт зочноор оролцож, оролцогч сурагч, хүүхдүүдэд хандан үг хэллээ.

НҮБ-ын загвар хуралдаанаар сурагчид англи хэл дээр эдүгээ дэлхий дахинд тулгамдаад буй эмзэг сэдвүүдийг хөндөн эшлэж хэлэлцүүлдэг нь хүүхдүүдийн англи хэлний болон мэтгэлцэх чадварыг сайжруулж өөртөө итгэх итгэлийг нь нэмэгдүүлэхээс гадна цаашид гадаадын их, дээд сургуульд тэтгэлэгтэйгээр элсэн суралцахад нь түлхэц болох томоохон ач холбогдолтой юм. Оролцсон бүх сурагчдад “Улаанбаатар Элит” олон улсын дунд сургуулийн зүгээс сертификат олгосон билээ.