Жерар Депардье нутаг сэлгэн явсаар Алжирын иргэн болжээ

Францын жүжигчин,кино од Жерар Депардье Африк тивийн Алжир улсын иргэн болсон байна. Хэдхэн жилийн өмнө ОХУ-ын иргэн болж, олныг шуугиулж байсан Жерар Депардье гурав дахь удаа иргэншлээ сольж байгаа нь энэ. 2013 онд Францад өндөр орлоготой иргэдийнхээ орлогын тал хувийг татварт хураах хууль гаргаж буйд дургүйцсэн Жерар Депардье эх орноо орхин гарч ОХУ-ын иргэн болохоор шийдсэн юм. Ерөнхийлөгч Владимир Путин түүний хүсэлтийг талархан хүлээн авч,өөрийн гараар зарлиг гаргаж, жүжигчин эрийг Оросын иргэн болгосон. Түүгээр ч зогсохгүй  Саранск, Грозный хотод байр өгсөн билээ. Гэвч Жерар Орост нэг их удаан суурьшсангүй. 2015 онд Ерөнхийлөгчийн өгсөн байрыг зарж, Бельгид гарч амьдрахаар явсан.

Оросын иргэн болж, байр авч байсан алдарт жүжигчин гэнэт бодлоо өөрчилж, овлигогүй зан гаргаж гэнэт Алжирын иргэн болсонд оросууд дургүйцэж  байгаа аж. Яагаад энэ улсын иргэн болсон талаараа Жерар ярихдаа “Францын хуучин колони энэ орон үнэхээр бахархмаар улс. Ард иргэд нь ухаантай, боловсролтой. Францын эзэмшилд байхдаа уншиж чаддаг хүн бараг байгаагүй юм” гэж онцолсон байна.