Тэр өдрийг түүх мартахгүй

Өнөөдөр гуравдугаар сарын 22. Одоогоос 36 жилийн өмнө 1981 оны энэ өдөр  монгол хүн анх сансарт ниссэн билээ. ЗХУ-ын хоёр удаагийн баатар, сансрын нисгэгч Владимер Жанибеков, Монгол Улсын баатар Ж.Гүррагчаа нар “Союз-39” хөлгөөр сансар огторгуйн уудамд ниссэн бахархалт өдөр. Хуучнаар ЗХУ-ын Байконур дахь сансрын хөлөг хөөргөх талбайгаас  уг хөлгийг хөөргөсөн тэр өдрийг түүх мартахгүй.

Тэр үед Владимер Жанибеков 39 настай туршлагатай нисгэгч байсан бол Ж.Гүррагчаа хорин хэдтэй шижигнэсэн залуу нисгэгч байлаа. Тэд сансарт  найман өдрийн турш ажиллахдаа дэлхийг 124 удаа тойрсон. “Союз-39” хөлгийн багийнхан  гуравдугаар сарын 30-нд эх дэлхийдээ амжилттай газардсан.  Энэхүү тэмдэглэлт үйл явдал нь Монгол Улс сансрын уудамд техникээ гаргаж туршсан дэлхийн тав дахь орон, сансрын судалгааны төхөөрөмж бүтээж, нислэгийн явцад ашигласан 20 дахь орон, өөрийнхөө сансрын нисгэгчийг нисгэсэн дэлхийн арав дахь орон болж, түүхэнд нэрээ мөнхөлсөн билээ.

1981 оны тэр өдрүүдийг Монголын ард түмэн сансарт ниссэн хүүгийнхээ төлөө санаа зовнин, бас бахархан баярлан  өнгөрүүлснийг өнөөдөр дурсахад юутай таатай.  Монгол хүн сансарт нэрээ мөнхөлсөн гайхамшигт түүх үеийн үед дуурсагдах болно.