Нийтийн тээврээр үйлчлүүлж буй иргэдийн бэлэн мөнгөөр зорчих зөрчил багасч байна

Хичээлийн шинэ жил эхлээд нийслэлд хөл хөдөлгөөн нэмэгдсэнтэй холбогдуулан иргэдийн зорчих эрэлт байнга нэмэгдэж байгаа тул нийтийн тээврээр бэлэн мөнгөөр зорчих зөрчил ихсэж байна. Иймд 2018 оны 09 дүгээр сарын 10-ны өдрөөс 14-ний өдрийг хүртэл “Нийслэлийн тээврийн газар”-ын даргын  удирдамжийн дагуу нийтийн тээврээр үйчлүүлж байгаа зорчигчдын хөлс төлөлтөд хяналт шалгалт хийгдэж байна. Энэ талаар “Cити Баз Консалтинг” ХХК-ийн Хууль, Хяналт шалгалтын хэлтсийн дарга Д.Аюурзанаас тодрууллаа.

– Зорчигчдын хөлс төлөлтөд хяналт шалгалт эхлээд 3 хонож байгаа юм байна. Энэхүү хяналт шалгалтын үйл явцын талаар танилцуулна уу?

– “Нийслэлийн тээврийн газар”-ын даргын удирдамжийн дагуу зорчигчдын хөлс төлөлтөд хяналт шалгалт үргэлжилсээр байна. Тус шалгалтыг нийт 4 байгууллага хамтран гүйцэтгэж байгаа юм. Үүнд, Нийтийн тээврийн газар, “Улаанбаатар Смарт Карт” ХХК, Зорчигч тээврийн нэгтгэл, “Cити Баз Консалтинг” ХХК-ууд нэгдэн шалгалтыг хийж байна. Энэ хүрээнд Авто тээврийн хяналтын улсын байцаагч болон хяналт, шалгалтын ажилтнууд зорчигчдод мэдээлэл өгөх, нийтийн тээврээр үйлчлүүлж байхдаа бэлэн мөнгөөр бус смарт картаар зорчихыг сануулж, санамж бичиг өгөх, зорчигчийн товхимол (шалгагчийн эрх үүрэг, зорчигчийн эрх, үүргийн тухай) тараах, нийтийн тээврээр зөв боловсон үйчлүүлээсэй гэсэн хандлагыг иргэдэд хүргэн ажиллаж байна.

– Тус шалгалт нь нийслэлийн аль маршрутад хийгдэж байгаа вэ?

Дээрх дурьдсан байгууллагуудтай хамтран наймдугаар сарын 20-ны өдрөөс 31-ний өдрийг хүртэл энэхүү шалгалтыг хотын төвд буюу Энх тайвны өргөн чөлөө 5 шарын буудлаас зүүн 4 замын буудал, Зүүн 4 замаас офицеруудын ордон, батоник, цайз 16 зэрэг нийт 60 тээврийн хэрэгслийн зогсоолуудад иргэдэд хууль сурталчлах, бэлэн мөнгөөр зорчуулахгүйгээр зорчигчийн үүргийг танилцуулахын зэрэгцээ буудлуудад шугам дундын  шалгалт хийж ажилласан. Харин энэ шалгалтын хувьд дээрхтэй ижил зорчигчийн үүргийг танилцуулан ажиллахаас гадна карт цэнэглэх төхөөрөмжийг автомашинд байрлуулан, иргэдэд хүрч чадахгүй байгаа карт борлуулалт болон цэнэглэлтийг хотын алслагдсан хэсгийн тээврийн хэрэгслийн зогсоолуудад хүргэж ажиллаж байна.

Тодруулбал, Баруун, өмнөд хэсгийн 5-н байршил (120-оос-Зайсан, 120-оос-Яармаг, 5-н шараас-Сонсголон, 5-н шараас-Нефть, 5-н шараас-Ханын материал) болон Нийслэлийн зүүн, хойд хэсгийн 7-н байршил (3,4-р хороололын эцсээс-Гандан, Зурагтын эцсээс-Гандан, Баянбүрд-Дэнжийн мянга, 32-ын тойргоос-7-н буудал, Дарь эхийн эцсээс-Дамбын уулзвар, Шар хад-Цайз, Чулуун овоо-Улиастайн гүүр)-д тус тус ажиллаж байна.

-Иргэдийн зүгээс энэхүү үйл ажиллагаанд хэрхэн оролцож байна вэ?

– Дээрх 4 байгууллага нэгдэн карт цэнэглэх төхөөрөмжийг автомашинд байрлуулан ажиллуулж байна. Манай байгууллагын хувьд одоогийн байдлаар иргэдийн зорчих картанд 1 160 500 төгрөгний цэнэглэлт хийн, энгийн карт (том хүний) 103 ширхэг, хүүхдийн 10 ширхэг картыг худалдаалж, нийт 113 иргэн зорчих карттай болгожээ.

Иргэдийн хувьд нийтийн тээврээр зорчих картаа түргэн шуурхай худалдан авах, цэнэглэх боломж бүрдэж байгаад таатай хандаж байна.

–  Энэхүү шалгалтын явцад нийтийн тээврээр хичнээн иргэн бэлэн мөнгөөр зорчиж, зөрчил гаргасан бэ?

–  Бэлэн мөнгөөр зорчиж байгаа иргэдийн тоо эл шалгалтыг эхэлснээс хойш илт буурч байгаа билээ. Тухайлбал, шалгалтын эхний өдөр буюу есдүгээр сарын 10-ны өдөр тээврийн хэрэгслийн 37 зогсоол дээр 104 шалгагч байцаагчийн хамт өдрийн 8 цаг (өглөө 07:00-11 цаг, өдөр 16:00-20:00 цаг хүртэл)-аар шалгалт хийж, бэлэн мөнгөний 2202 зөрчлийг илрүүлсэн. Түүнчлэн 11-ний өдөр нийтийн тээврээр бэлэн мөнгөөр үйлчлүүлсэн 1637 зөрчил илэрсэн бол 12-ны өдөр 1567 зөрчил гарсан нь тус шалгалтыг хийсэн үр дүн эндээс харагдаж байгаа юм.

– Мөн жолоочийн зөрчилд арга хэмжээ авч байгаа гэсэн. Ямар арга хэмжээ авч байгаа вэ?

– Жолоочийн зөрчил нь нийтийн тээврээр үйлчлүүлж буй иргэдээс бэлэн мөнгө авч буйтай холбоотой юм. Харин энэ нь яг үнэндээ үйлчлүүлж буй иргэд бэлэн мөнгөөр зорчсноос үүдэж жолоочийг зөрчилд оруулаад байгаа. Жолооч нь зорчигчоос гар дээрээ мөнгө авсан тохиолдолд зөрчлийн тухай хуулийн журманд заасны дагуу хариуцлага тооцуулдаг. Иймд нийтийн тээврийн хэрэгслийн жолооч өөрийн эрх үүргээ ухамсарлан зорчигчоос бэлэн мөнгө авахгүй, смарт картаар үйлчлүүлэхийг иргэддээ сануулвал бидний хийж буй ажлын үр дүн гарч байгаа нэг илрэл юм. Тиймээс нийтийн тээврээр үйлчлүүлэхдээ зорчих төлбөрөө бэлэн мөнгөөр бус смарт картаа худалдан авч, урьдчилан цэнэглүүлэн үйчлүүлж байхыг иргэддээ уриалж байна.

Ярилцсанд баярлалаа.