УИХ-ын гишүүн Ц.Гарамжав ажлын хэсэг ахална

УИХ-ын гишүүн С.Бямбацогт, Л.Мөнхбаатар нарын 14 гишүүний өргөн мэдүүлсэн Гэмт хэрэг, зөрчлөөс урьдчилан сэргийлэх тухай хуулийг энэ намрын чуулганаар хэлэлцэж буй.

Гэмт хэргийг гарсан хойно нь илрүүлэх биш хэрэг гарахаас урьдчилан сэргийлэх зохицуулалтыг нарийвчлан тусгасан тус хуулийг хэлэлцүүлэгт бэлтгэх Хууль зүйн байнгын хорооны ажлын хэсгийг УИХ-ын гишүүн Ц.Гарамжав ахлахаар боллоо.

Гэмт хэргээс урьдчилан сэргийлэх тухай хуулийг анх 1997 онд баталж, 7 удаагийн нэмэлт өөрчлөлт оруулжээ. Энэхүү хуулийг анх батлагдсанаас хойш 10 гаруй жилийн дараа ийнхүү шинэчилсэн найруулгаар батлах гэж байна.

Монгол Улсын хувьд гэмт хэрэг гаралтын тоо сүүлийн 10 жилийн хугацаанд тогтмол өсч  байна. Өнгөрсөн онд улсын хэмжээнд 32 мянга 200 орчим гэмт хэрэг бүртгэгдсэн нь 2017 оныхоос 5 мянга буюу 18.7 хувиар өссөн тоо юм. Мөн сүүлийн жилүүдэд мансууруулах эм, цахим орчин дахь гэмт хэрэг зэрэг шинэ төрлийн гэмт хэргүүд нэмэгдэж байгаа нь хуульд шинэчлэлт хийх зайлшгүй шаардлага байгааг харуулж байна.

Одоо хүчин төгөлдөр хэрэгжиж байгаа хуулиар зөвхөн гэмт хэргээс урьдчилан сэргийлэх асуудал хамаарч байгаа бол шинэчилэн найруулсан хуулийн төсөлд зөрчлөөс урьдчилан сэргийлэх асуудлыг нэмж, өргөжүүлсэн байна. Мөн гэмт хэрэг, зөрчлөөс урьдчилан сэргийлэхтэй холбоотой бүх шатны харилцааг нарийвчлан тусгасан. Үүнд иргэн, хуулийн этгээдийн оролцоог ч тусгасан нь гэмт хэргээс урьдчилан сэргийлэх ажлыг бүх нийтийн үйл хэрэг, үүрэг болгож буй хэрэг юм.