Нийгмийн даатгалын ерөнхий газар МҮЭ-ийн холбоотой хамтран ажиллахаар боллоо

Нийгмийн даатгалын ерөнхий газрын дарга Д.Зоригт, Монголын Үйлдвэрчний Эвлэлийн холбооны ерөнхийлөгч Х.Амгаланбаатар нар хамтран ажиллах санамж бичигт гарын үсэг зурлаа. Монгол улсын Үндсэн хууль, Иргэний хууль, Нийгмийн даатгалын багц хуулиуд болон холбогдох бусад хууль тогтоомжийн хүрээнд иргэд, даатгуулагчид нийгмийн даатгалын шимтгэл төлөлтөндөө хяналт тавьдаг байх, ажил олгогчоос нийгмийн даатгалын шимтгэлийг тухай бүр бүрэн төлүүлж хэвшүүлэхэд хоёр тал харилцан тохиролцож, хамтран ажиллах юм.
Ажил олгогч нь ажилтнуудынхаа нийгмийн даатгалын шимтгэлийг олон сараар төлдөггүй, санаатайгаар зайлсхийдэг тохиолдол олон. Энэ явдлыг таслан зогсоож, ажил олгогчдын хариуцлагыг дээшлүүлэх, даатгуулагчдын эрх ашгийг хамгаалан нийгмийн баталгааг нь хангаж ажиллах нь чухал гэдэгт хоёр тал санал нэгдсэн юм.