“Тал нутгийн Монгол” олон улсын марафон гүйлтийн тэмцээн болно

“Тал нутгийн Монгол” олон улсын марафон гүйлтийн 23 дахь удаагийн тэмцээнийг есдүгээр сарын 08-ны өдөр “Хүй долоон худаг”-т зохион байгуулах гэж байна. Энэ талаар өнөөдөр Монголын Хөнгөн атлетикийн холбооны ерөнхий нарийн бичгийн дарга Ч.Зоригтбаатар, Нийслэлийн Аялал жуулчлалын газрын бодлогын хэрэгжилтийн хэлтсийн дарга В.Батчимэг, Япон Улсын иргэн Кон Аяа, Монголын Үндэсний олимпийн хорооны Олимпийн боловсрол хариуцсан мэргэжилтэн З.Гомбодорж нар мэдээлэл хийв.

Тэмцээн нь өсвөр үе, насанд хүрэгчид, ахмадууд, хөгжлийн бэрхшээлтэй иргэн гэсэн дөрвөн үндсэн ангиллаар зохион байгуулагдах аж. Оролцогчдын гүйх зай нь 3 км, 5 км, 10 км, 21 км юм байна. Зай тус бүрт эхний гурван байранд орсон тамирчдыг медаль, өргөмжлөл, мөнгөн шагналаар шагнана. Хамгийн холын зай болох 23 км-т түрүүлсэн эрэгтэй, эмэгтэй тамирчдыг хурдан удмын даагаар шагнах аж. Энэ жилийн тэмцээнд зургаан улсын 3.000 гаруй тамирчид, гүйлт сонирхогчид, оюутан, сурагчид оролцоно.

Монгол Улсын соёл, онгон байгаль, зан заншлыг сурталчлах, хөнгөн атлетикийн спортыг дэлгэрүүлэн хөгжүүлэх, хүүхэд залуучуудын бие бялдарын өв тэгш хөгжлийг хангах, эх оронч үзлийг төлөвшүүлэх, шилдэг тамирчдыг нээн илрүүлэх зорилгоор зохион байгуулагддаг “Тал нутгийн Монгол” олон улсын марафон гүйлтийн тэмцээний үеэр соёл, урлаг, нийтийн үйлчилгээ, мэдээлэл сурталчилгааны олон арга хэмжээ зохион байгуулагдана гэж албаны хүмүүс онцолж хэлсэн юм.

Энэ удаагийн “Тал нутгийн Монгол” марафон гүйлтийн тэмцээний ерөнхий зохион байгуулагчаар Монголын Хөнгөн Атлетикийн холбоо, ерөнхий ивээн тэтгэгчээр “Мобиком” корпораци “Candy” цахим мөнгө, хамтран зохион байгуулагчаар Нийслэлийн Аялал жуулчлалын газар, Монголын Үндэсний олимпийн хороо, Төв аймгийн ЗДТГ болон бусад холбогдох газрууд хамтран зохион байгуулж байна.
                                                                              Нийслэлийн ЗДТГ-ын Хэвлэл мэдээлэлтэй харилцах хэлтэс