“Ice top” хамтлаг өвөрмөц пянзаа гаргалаа

Монголын хип хоп хамтлагийн шилдгүүдийн нэг бол Ice top хамтлаг юм. Монголын анхны хип хоп хамтлагуудын нэг болох тус хамтлагийнхан урын сандаа нийт 500 гаруй уран бүтээлтэй. Тэд 1998 оноос эхлэн үзэл бодлоо бүжгээр бус хип хоп үг хэллэгээр, түүн дотроо урлаг яруу найраг шударга үнэн үгийг хэлэх ёстой” гэж үзэн 1998 оны аравдугаар сарын 13-ны өдөр найман хүний бүрэлдэхүүнтэй байгуулагджээ.

Хамтлагийн залуус байгуулагдсан цагаасаа хойш нийгмийн ажилд идэвхтэй оролцож, хандивын болон буяны тоглолтуудад олон удаа оролцож байсан.

Хүүхдийн асран хамгаалах төв болон өндөр настнуудын халамжийн төв хүүхдийн урьдчилан хорих төв, засан хүмүүжүүлэх төвүүдээр сайн дурын үнэ төлбөргүй хандивын тоглолт арга хэмжээг зохион байгуулсаар ирсэн билээ. Тэгвэл тэд өнөөдөр “Монгол” нэртэй пянзаа үнэнч фэнүүддээ зориулан гаргасан бөгөөд “Анхны хайр”, “Тоонот”, “Их аваргууд”, “Тэнгэр өөд” зэрэг бүх цаг үеийн хит дуунууд нь багтжээ. Мөн Монгол өв соёл, язгуураа багтаасан өвөрмөц пянз нь оюуны өмчөөр баталгаажсан нууцлал өндөртэй уран бүтээл болсон гэдгийг тус хамтлагийнхан онцолж байна.