Спортын болон тоглоомын талбайг 06:00-22:00 цагийн хооронд нээлттэй байлгах захирамж гарлаа

Сургууль, цэцэрлэг амрах үеэрээ хашаагаа түгжиж, хүн оруулдаггүй. Мөн сүүлийн үед СӨХ-д харьяа байрныхаа тоглоомын талбай, сагсны шийдийг түгжих гэх мэтээр хүүхдийн тоглох, хөгжих эрхийг хязгаарлах болсон. Иймд Нийслэлийн Засаг дарга А/763 тоот Хүүхдийн эрүүл, аюулгүй орчинд хөгжих, тоглох эрхийг хангах талаар зарим арга хэмжээг авах тухай захирамж гаргалаа.

Захирамжаар хүүхдийн авьяас чадварыг хөгжүүлэх, чөлөөт цагаа үр ашигтай өнгөрүүлэх орчин, нөхцөлийг бүрдүүлэх зорилтын хүрээнд ерөнхий боловсролын сургууль, цэцэрлэг, орон сууцны хороололд байрлах биеийн тамир, спортын болон тоглоомын талбай, ногоон байгууламжийг өдөр бүр 06:00-22:00 цагт нээлттэй байлгаж, хүүхэд тоглох, ашиглах нөхцөл бүрдүүлэхийг үүрэг болгов. Мөн болзошгүй осол, эрсдэлээс сэргийлж, биеийн тамир, спортын болон тоглоомын талбай, тоглоом, хашаа хашлаганы бүрэн бүтэн, аюулгүй байдлыг хангаж, анхааруулга, заавар, зөвлөмж байршуулахыг даалгасан юм.

Нийслэлийн нутаг дэвсгэр дэх өмчийн бүх хэлбэрийн ерөнхий боловсролын сургуулийн захирал, цэцэрлэгийн эрхлэгч нар, СӨХ-ны дарга нарт хаяглан үүрэг болгосон энэхүү захирамжийн хэрэгжилтийг зохион байгуулж, үр дүнг тухай бүр танилцуулах үүргийг Нийслэлийн Боловсролын газар, Нийслэлийн Мэргэжлийн хяналтын газрын удирдлагууд хүлээлээ.