Зөрчил гаргасан мод модон материалын худалдаа эрхлэгчдэд мөнгөн торгууль ногдууллаа

Хэрэглэгчдээс ирүүлсэн гомдол, мэдээллийн дагуу нийслэл хотод үйл ажиллагаа явуулж байгаа “Хангай”, “Цайз”, “Цогбадрах” захуудад худалдан борлуулагдаж буй модон материал нь хэмжээ, чанар стандартад нийцэж байгаа эсэхэд ШӨХТГ-аас ШУТИС-ын харьяа Ой модны сургалт судалгааны хүрээлэнтэй хамтран удирдамжтай хяналт шалгалт хийсэн.

Хяналт шалгалтын хүрээнд Ой модны сургалт судалгааны хүрээлэнгээс зүсмэл модон материалаас 99 ширхэгийг сонгон авч “Шилмүүст төрлийн зүсмэл модон материал Техникийн шаардлага MNS 0391:2010 стандарт”-д заасан хэмжээст харьцуулах байдлаар хэмжилт, зэрэглэлд хамруулсан байна. Хэмжээсийн хувьд зүсмэл модны зузаан, өргөн нь заагдсан хэмжээнээс дутуу байсан бол зэрэглэл буюу чанарын хувьд 4 дүгээр зэрэглэлийнх 45 гаруй хувийг эзэлж байгаа тухай дүгнэлт ирүүллээ. Барилга байшин барихад 4 дүгээр зэрэглэлийн зүсмэл модон материал нь чанар стандартын шаардлага хангадаггүй учраас ихэвчлэн дүүргэлт зэрэгт ашигладаг байна.

Хяналт шалгалтаар зүсмэл модон материалын зузаан, өргөн, урт гэсэн 3 хэмжээ стандартын шаардлагад нийцээгүй, багцалсан /м/куб/ хэмжээсээр худалдаалахдаа стандартад заасан болон байвал зохих тоо, ширхэг дутуу, стандартад заасан хэмжээсээс зөрүүтэй байдлаар нэрлэсэн хэмжээс бий болгох замаар худалдаалж байсан, мөн мод, зүсмэл модон материалын үнэ болон хэмжих нэгж, хэмжилтийн талаарх үнэн зөв, бодит мэдээллийг хэрэглэгчдэд өгдөггүй зэрэг зөрчил дутагдал илэрсэн байна. Зөрчил гаргасан худалдаа эрхлэгчдэд холбогдох хуулийн дагуу мөнгөн торгууль ногдуулж, захын удирдлага болон нийт худалдаа эрхлэгчдэд улсын ерөнхий байцаагчийн албан шаардлага хүргүүллээ.

Хэрэглэгч та бүхэн гомдол саналаа

• Хэрэглэгчийн мэдээллийн төвийн утас: 115

• ЗГ-ын Иргэд олон нийттэй харилцах төвийн утас: 11-11

• Цахим хаяг: afccp.gov.mn

• Цахим шуудан: bichigkhereg@afccp.gov.mn

• facebook.com/afccpmongolia

• twitter.com/afccpmn

• “e-barimt.mn” хавсралт болон цахим хаягаар

• https://www.facebook.com/groups/391583442769715/ бүлгэм гэсэн сувгаар ирүүлж, бидэнтэй хамтран ажиллана уу гэж Шударга өрсөлдөөн, хэрэглэгчийн төлөө газраас мэдээллээ.