Дүрвэгсдийн багийн 18 настай тамирчин 20 хүний амийг аварчээ

Олимпт оролцож байгаа тамирчин бүрийн цаана сонирхолтой түүх байдаг бөгөөд Юсра Мардини хэмээх Сири охины түүх үнэхээр баатарлаг юм.

Мардини бол ОУОХ-ны далбаан дор оролцож байгаа дүрвэгсдийн  багийн усан сэлэлтийн тамирчин  билээ. Хэдий тэрээр 18-хан настай боловч живж буй усан онгоцноос өөртэйгээ нийлүүлээд 20 хүний амийг аварчээ. Туркээс хөдлөөд 30 минут орчим явсны дараа сууж явсан моторт усан онгоц нь задгай далайд осолджээ. Тэрээр энэ тухай ярихдаа:

“Тэнд байсан хүмүүсээс дөрвөн хүн л сэлж чаддаг байсан. Би нэг гараараа онгоцны олсноос бариад  хоёр хөл, нэг гараараа л сэлж байсан. Гурван цаг гаруй хүйтэн усанд байхад хамаг бие үнэхээр.. Би энийг дүрсэлж хэлж чадахгүй байна” …

Мардини одоогоор Берлинд амьдардаг бөгөөд эмэгтэйчүүдийн 100 метрийн усан сэлэлтэд хүч сорих юм байна. Ажиглагчдын зүгээс түүнд их найдвар тавьж байгаа гэнэ.