Засгийн газрын шинэ томилгоо

Өчигдөр Засгийн газрын хуралдаан болж зарим газрын дарга нарыг томилсон байна. Тухайлбал Г.Ганболдыг өөрийнх нь хүсэлтээр Засгийн газрын Хэрэг эрхлэх газрын дэд даргаас чөлөөлж, тус газрын дэд даргын үүргийг түр орлон гүйцэтгэгчээр У.Бямбасүрэнг томилсон байна. У.Бямбасүрэн нь 2010-2012 онуудад Нийгмийн хамгаалал, хөдөлмөрийн яамны Төрийн нарийн бичгийн даргаар ажиллаж байсан бол 2013 оноос МАН-ын Ерөнхий нарийн бичгийн дарга Ж.Мөнхбатын ахлах зөвлөхөөр ажиллаж байсан юм.

Гадаадын иргэн, харьяатын газрын даргын үүргийг түр орлон гүйцэтгэгчээр УИХ-ын гишүүн асан, ЦЕГ-ын дарга асан Д.Мөрөн Д.Мөрөнг томилжээ. Тэрээр өмнө нь тус газрын даргаар ажиллаж байсан бөгөөд 2014 оноос МАН-ын Эрх зүй, аюулгүй байдлын бодлогын газрын даргаар ажиллаж байжээ.

Гэр бүл, хүүхэд, залуучуудын хөгжлийн газрын даргын үүргийг түр орлон гүйцэтгэгчээр О.Алтансүхийг томилсон. Хүүхдийн төлөө үндэсний газрыг Ж.Эрдэнбатын Засгийн газар Гэр бүл, хүүхэд, залуучуудын хөгжлийн газар болгон өөрчилсөн бөгөөд ийнхүү даргыг нь томилов. О.Алтансүх нь МАН-ын Бага хурлын гишүүүн, НАМЗХ-ны ерөнхий нарийн бичгийн даргаар ажиллаж байсан. Монголын залуучуудын холбооны ерөнхий нарийн бичгийн даргаар ажмллаж байжээ.

Харилцаа холбоо, мэдээлэл технологийн газрын даргын түр орлон гүйцэтгэгчээр Б.Чинбатыг томилсон. Б.Чинбат нь ШУТИС-ийн Холбоо, мэдээлэл технологийн сургуулийг мэдээллийн технологийн инженер мэргэжлээр төгссөн. 2002-2004 онд Япон улсад AOTS /Association for Overseas Technical Schorlarship/-д мэдээллийн технологийн чиглэлээр суралцаж, Японы Yamamoto Mfg компанид ажиллаж байжээ. Франц, ХБНГУ, Эстони, БНСУ, Финлянд зэрэг улсуудад мэдээллийн технологи, цахим үнэмлэхийн үйлдвэрлэл, хэрэглээ, цахим засаглал, цахим сонгууль зэрэг чиглэлээр тус тус мэргэжил дээшлүүлсэн.Гаалийн ерөнхий газар, Улсын бүртгэлийн ерөнхий газар зэрэг байгууллагуудад програмист, хэлтэс, газрын даргаар ажиллаж байсан туршлагатай, мэргэжлийн хүн юм. Б.Чинбат “Иргэний бүртгэлийн улсын нэгдсэн сүлжээ байгуулах төсөл”, “Сонгогчдын бүртгэлийн системийг автоматжуулах төсөл”, “Иргэний цахим үнэмлэх төсөл”, “Иргэний бүртгэлийн цахим архив төсөл” зэрэг томоохон төслүүдийн удирдагчаар ажиллаж, амжилттай нэвтрүүлсэн. Мэдээллийн технологи, шуудан, харилцаа холбооны салбарын болон Улсын бүртгэлийн тэргүүний ажилтан цол, тэмдэгтэй. 2011 онд төр, засгийн дээд шагнал Алтан гадас одон хүртсэн юм байна.

Цаг уур, орчны шинжилгээний газрын даргын түр орлон гүйцэтгэгчээр С.Энхтүвшинг томиллоо. Тэрээр өмнө нь тус газрын даргаар ажиллаж байсан. Засаг төр солигдоход ажлаа Д.Цогт-Очирт хүлээлгэн өгч байсан ч “суудалдаа” эргэн ирлээ.