“Халамж”-ийн Д.Баярсайханы хамаатнуудыг маргааш шүүнэ

Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүх арваннэгдүгээр сарын 2-нд Д.Отгонтөгс, Д.Отгонгэрэл, Б.Эрдэнэсувд зэрэг хүмүүст холбогдох, Эрүүгийн хуулийн 150, 1661-д заасан зүйл ангиар яллах дүгнэлт үйлдсэн хэргийг хэлэлцэхээр болжээ.

Тус хэрэгт НХҮЕГ-ын дарга асан Д.Баярсайханы нэр холбогдож онц их хэмжээний эд хөрөнгө завшсан, мөнгө угаасан хэмээн буруутгагдаж удаан хугацаанд шалгагдаж байсан билээ. Гэвч прокурорын байгууллагад хэрэг нь хянагдаж байхад түүнд холбогдох хэргийг хэрэгсэхгүй болгосон байна. Ямартай ч Д.Баярсайханы нэр тус хэрэгт холбогдож шүүгдэх хүмүүсийн нэрсээс хасагджээ.

Хэргийг сануулахад, Д.Баярсайхан нарын 10 хүнд холбогдох хэргийг 2014 оноос эхлэн шалгаж эхэлсэн юм. Тухайн үед Д.Баярсайхан нарын хүмүүсийг шалгахдаа албан тушаалаа урвуулан ашиглаж, 20 орчим компанийг өөрсдийн ах дүү нарын нэр дээр байгуулан, халамжийн мөнгийг шилжүүлэн авсан хэмээж байв. Мөн тэд ойролцоогоор 4.5 тэрбум төгрөг завшсан байж болзошгүй гэх мэдээлэл баривчилгааны дараа цацагдаж байсан удаатай.

Мөн мөрдөн байцаалтын явцад дээрх хүмүүс Нийгмийн халамжийн сангийн хөрөнгөөс хуурамч баримт бүрдүүлж, садан төрлийнхөө нэр дээрх төрийн бус байгууллагуудад шилжүүлэн завшсан нь тогтоогдсон гэх. Тэд нийтдээ 1.3 тэрбум төгрөгийн хохирлыг улсад учруулсан нь батлагдсан мэдээлэл гарсан. Энэ бол сарын өмнөх мэдээлэл. Тэгвэл холбогдох эх сурвалжийн өгсөн мэдээллээр хамгийн сүүлд гаргасан шинжээчийн дүгнэлтээр хохирлын хэмжээ 900 гаруй сая төгрөг болон буурсан байна.

П.АНИР
Оллоо.мн