Оросын зохиолч В. Т. Слипенчукийн уран бүтээлийн үдэшлэг,номын нээлт боллоо

Оросын зохиолч Виктор Трифонович Слипенчукийн мэндэлсний 75 жилийн ойд зориулсан уран бүтээлийн үдэшлэг ОХУ-ын Уран зохиолчдын төв ордонд 10 дугаар сарын 28-нд болж, “Просверк клинка” шинэ номын нь нээлтийн хүндэтгэлийн арга хэмжээнд Монгол Улсаас ОХУ-д суугаа Элчин сайдын яамны Элчин зөвлөх Г.Зоригт оролцож, баяр хүргэж үг хэлэв.

В.Т.Слипенчук нь 14 настайгаасаа уран зохиолын гараагаа эхэлж, роман, найраглал, тууж, өгүүллэг, шүлэг, зохиомж  зэрэг олон хэлбэрээр туурвидаг уран бүтээлч билээ. Түүний уран бүтээл орос хэлнээс гадна, монгол, вьетнам, франц, серб, япон, хятад хэл дээр орчуулагдан гарчээ. Тухайлбал, 2015 онд түүний “Звездный спас” роман, “Чингис хаан” /1964 онд бичсэн/ найраглалыг монгол хэлнээ орчуулан Улаанбаатар хотод хэвлэсэн байна. 2012 онд В.Т.Слипенчукт Чингис хааны нэрэмжит Их засаг олон улсын их сургуулийн хүндэт докторын  цол хүртээжээ.

Оросын зохиолч В.Т. Слипенчукийн мэндэлсний 75 жилийн ойд зориулсан уран бүтээлийн үдэшлэг дээр түүний зохиосон шүлгийн дуунуудыг орос, буриад, халимагийн дуучид дуулж, өөрөө зарим шүлэг найраглалаасаа уншиж сонирхуулан, арга хэмжээнд оролцогчдод  “Просверк клинка” номоо бэлэглэв.

Тэрээр олон нийтэд алдаршсан “Барабанщик” дууны үгийг зохиожээ. В.П.Слипенчукийг ОХУ-ын “Гавьяат зохиолч” цол, тэмдгээр шагнасныг Зохиолчдын Холбооноос нь гардуулан өгөв.

ОХУ-д суугаа Монгол Улсын ЭСЯ-ны нэрийн өмнөөс В.Т. Слипенчукт Чингис хааны Тамганы жижиг хэвлэмэлийг хайрцагтай нь, мөн Слипенчукийн удмынхны гэр бүлийн сүлд /фамильный герб/-ийг  жаазалж дурсгав.

Виктор Трифонович Слипенчукийн хөдөлмөр, бүтээлийг үнэлж, Монгол Улс, ОХУ-ын хооронд дипломат харилцаа тогтоосны 95 жилийн ойг тохиолдуулан  Монгол Улсын Ерөнхийлөгчийн зарлигаар түүнийг “Найрамдал” медалиар шагнасан болно.