Дэдүүдийг “баяртай” гэх зоригтой хүн МАН-д байна уу

Сангийн сайд илүү зардлаа багасгах гэж нэлээд хугацаанд тархиа гашилгах шиг боллоо. Эцэст нь хүүхдийн мөнгийг хасах, тэтгэвэрт гарах хүмүүсийн насыг 65 болгох,татвар нэмэх энэ тэр гэсэн ард түмнийг гоочилсон хэдэн гарц олов. Улс орны төсөв санхүү, эдийн засаг хямралтай байгааг хэн хүнгүй мэдэж байгаа. Уг нь аль ч улс орон хүндрэл бэрхшээл тохиолдоход төрийн илүү зардлаа танадаг аж. Ард түмнийхээ амьдралд аль болох хүндрэл,дарамт учруулахгүй байхыг чухалчилдаг гэнэ.

Гэтэл манайхан төрийн “данхар” бүтцийг хамгаалан хайрлаж байна. Өнөөдөр Монголын төрд дэд сайдууд,орлогч дарга нар гэх мэтчилэн байлаа гээд нэмэр багатай,байхгүй гээд үгүйлэгдэхгүй албан тушаалтан олон байна. Яагаад тэр хэрэггүй шахам дэдүүдийг бөөцийлнө вэ. Төрийн нарийн бичгийн дарга гээд яам болгонд байж байхад дэдүүд машин унаж,өндөр цалин хангамж эдэлж эрхлэн суух хэрэг байна уу.

13 дэд сайдыг “байхгүй болговол” хэмнэлт гарна. 13 туслах, 13 жолооч хэмнэгдэнэ. Тэгээд бас утас шөрмөс,бичиг цаасны зардлаас авахуулаад гадаад,дотоод томилолт, зугаалгын зардлыг хэмнэнэ гэвэл багагүй дүн гарна. Тэгээд бас унадаг машины бензин,тос,техникийн зардал, хангамж гээд хайран мөнгө талийхаа болино.

Дэдүүд намынхаа төлөө яахаас ч буцахгүй үнэнч тэмцсэнийхээ төлөө тэр зөөлөн суудалд тухалдаг болсон,шуудхан хэлбэл дэд сайд бол шагнал. Аль ч нам төр барьж байхад дэдүүд байсан. Тэднийг юу гэж хэлээд ч сайн дураараа албан тушаалаасаа татгалзана гэдэг гонж. Хэдий хүртэл дэдүүд даанч зөөлөн суудал, гоёмсог ширээ сандалтайгаа зууралдсаар байх бол. Дэлхийн улс орнууд эдийн засаг хүндэрлээ гэхэд гадаад дахь нэн шаардлагагүй Элчин сайдын яамдаа түр хаах, зарим улс төрийн нэн шаардлагагүй албан тушаалыг цөөлөх гэх мэт арга хэмжээ авдаг юм гэсэн. Гэтэл манайх шинээр Элчин сайдын яам нээж,намынхаа төлөө бөнжигнөн гүйсэн нөхдөө “санаа амар жаргатугай” гээд томилдог уламжлалтай.

Индонезид байгаа Элчин сайд тийм чухал уу гэж ард түмэн эргэлзэж байна. Хэдэн сая доллар эх орноосоо хулгайлж аваачаад офшорт нуучихсан С.Баярыг элчин сайдаар өргөмжлөөд явуулсан. Энэ мэт олныг гайхшруулсан баримт дурдаж болох.

Өнөөдөр МАН улс орны эдийн засаг хямралтай,хэцүү байна гэх боловч ачааны хүндийг ард түмний нуруун дээр дааж ядтал үүрүүлэв. Татвар нэмэхийн оронд хийж бүтээгээд гавьдаггүй дэд сайд нарыг болиулсан бол… хэмээх гомдол харамслыг монгол хүн бүр ярьж байгаа. Өнгөрсөн хэдэн жил АН-ыг төр барихад МАН-ын УИХ дахь бүлгээс АН-ыг дэд сайд нараа огцоруулахыг шаардаж, мэдэгдэл хүргүүлж бишгүй хэл үгээ хурцалж байснаа тэд мартжээ. Зарим гишүүд эсэргүүцэл илэрхийлж галтай цогтой хатуу үг чулуудаж байсныг ард түмэн сануулж байна. Гэтэл өнөөдөр төрийн жолоон дээр суусан МАН “дэд сайд нар шиг хэрэгтэй хүмүүс ховор шүү” гээд тэднийг хамгаалах бодлогоосоо ухрахгүй байна.

Дэдүүдийг огцруулчихвал наад зах нь хүүхдийн мөнгөнд нэмэртэй гэж УИХ-ын гишүүн Пүрэвдорж хэлж байсан. Тэрээр “МАН-хан та нар дэд сайдын албан тушаалыг үгүй болгохгүй байж хүүхдийн мөнгөн дээр гар татаж байгаа нь үнэхээр ой гутмаар байна. Наад 13 дэд сайдын чинь цалин хангамжаар 78 мянган хүүхдийн мөнгө олгохоор байна” гэж мэдэгдэв. Хүүхдийн мөнгө хумслаад албан тушаалтай зууралдаад сууж байгаа 13 дэд сайд ч гэж ёстой л нэрэндээ таарсан “лүднүүд” юм даа. Нэг л сайхан өдөр дэдүүд “баяртай” гэвэл ард түмний нуруу жаахан ч гэсэн амсхийнэ дээ.

Н.Намуун