У.Хүрэлсүхийг Ерөнхий сайд болгоно гэх “бор шувуунууд” чимээгээ аяд

Ж,Эрдэнэбатын Засгийн газар огцроод тав хонох гэж байна. Дараагийн Ерөнхий сайд болох хүсэлтэй хүмүүс цөөнгүй байгаа. Засгийн газрыг огцруулахыг хүссэн хүмүүс санасандаа хүрч сууж байгаагаасаа илүү зөөлөн суудал зүүдэлж байгаа нь илт.

МАН-ын хоёр дугаар ээлж хоолондоо oрохоор халбага, сэрээгээ хангинуулаад эхэлсэн. Засгийн эрх хэний мэдэлд шилжих нь одоохондоо оньсого хэвээр байна. Ж.Эрдэнэбатын Засгийн газрын шадар сайд У.Хүрэлсүхийн нэр дараагийн Ерөнхий сайдад нэлээд чанга сонсдож байсан боловч боломжгүй нь тодорхой болов.

60 тэрбумын хэрэг олныг шуугиулж, М.Энхболд сонгуульд ялагдахад МАН-ын дараагийн дарга бөгөөд Ерөнхий сайд нь У.Хүрэлсүх юм байна гэж олон нийт харж байв. Гэтэл М.Энхболд тийм амар тахимаа өгдөг хүн биш аж. Ерөнхий сайд Ж.Эрдэнэбатад намын даргын суудал шилжих магадлалтай болмогц У.Хүрэлсүх үүнийг тэвчсэнгүй.

Ж.Эрдэнэбатыгаа хамгийн өөдгүй амьтны дүрд хувиргаж аль муу муухайг түүнд шавж орхив. Тагнаж чагнасан” гэхээс авахуулаад ОУВС-тай байгуулсан гэрээ, хүүхдийн мөнгийг хууль зөрчиж олгосон, УИХ-аас зөвшөөрөл авалгүй хууль зөрчиж гэрээ байгуулсан 800 тэрбумын концесс гээд явж өгсөн дөө. Ийнхүү Засгийн газрыг элдвээр буруутган хоёр сар доош хийв. Эцэст нь санасандаа хүрч унагаж чадсан. Нэгэнт болоод өнгөрснийг нэхэн дурсаад өөрчлөгдөх биш.

Цаашид хэрхэхийг харах үлдэв. У.Хүрэлсүхийн хувьд сонгуулийн дараагаас ярьж эхэлсэн намын шинэчлэл хийе гэсэн байр суурь дээрээ гуйвалтгүй зогссон бол өнөөдөр Ерөнхий сайд болох байсан ч байж магадгүй. Одоо бол ёстой “горьд” болсон доо. 60 тэрбумын хэргээс болж шавартай хутгалдсан МАН-ын нэр хүндийг сэргээх ганц найдвар нь нам доторхи шинэчлэл байсан.

Хэрэв У.Хүрэлсүх тэрийг зөв олж харсан шигээ тууштай байсан бол… гэж намын нөхөд нь харамсаж байна. Ихэд цатгалан Монголын эрх мэдэлтнүүд намын доторхи шинэчлэлээс илүү “бялуу” хуваах,зөөлөн суудалд тухлахыг эрхэмлэсээр байгаад дууслаа. Хэрэв У.Хүрэлсүх өөрийнхөө Засгийн газартай үзэлцэж байхаар Бага хурлаа хуралдуулаад намын даргаа авчихсан бол өнөөдөр түүнтэй хэн юу ярих вэ.

Хэн нэгэн этгээд цор цор гэвэл “уучлаарай,намын дарга Ерөнхий сайд болох ёстой” гээд л хэлэх үггүй болгох байлаа. Өөрөө унасан хүүхэд уйлдаггүй гэдэг. Буруу нүүдэл хийсний гай энэ юм. Харин одоо У.Хүрэлсүхэд ямар ч шанс байхгүй.

Муу ажилласан гэсэн тодотголтой Засгийн газартайгаа хамт уначихаад би ганцаараа сайн байсан,одоо намайг Ерөнхий сайд болгоодох гэлтэй биш амаа жимийсэн нь дээр.

У.Хүрэлсүхийг дараагийн Ерөнхий сайд мөн энэ тэр гээд байгаа “бор шувуунууд” одоо чимээгээ аяд. Монголын заяа буян барагдаагүй байна.

Н.Дөл