Г. Маралмааг хүүхэдтэй нь ойр байлгаж өгөхийг хүсчээ

Дөрвөн настай охиныхоо аминд хүрсэн хэргээр шалгагдаж байгаа Г. Маралмаа цагдан хоригдож байхдаа хүүхдээ төрүүлсэн. Шүүхээс ял авсан боловч Дээд шүүхээс хэргийг нэмэлт мөрдөн байцаалтанд буцааснаар одоо цагдан хорих ангид хоригдож байна. Түүний таван сартай хүүхдийг нь нагац эгч нь асран хамгаалдаг бөгөөд тэрээр өөрөө хоёр хүүхэдтэй өрх толгойлсон эмэгтэй аж. Эрхэлсэн ажилгүй учраас амьдрал нь тийм сайн биш гэдгээ дурьдаад Г. Маралмааг хүүхэдтэй нь ойр байлгах болон түүний хүүхдийн асран хамгаалагчийн асуудлаар Хүний эрхийн үндэсний комиссийн Гомдол хяналтын хэлтэст өргөдөл ирүүлжээ. Хуулиндаа жирэмсэн болон гурав хүртэлх насны хүүхэдтэй эмэгтэйд оноосон ялыг хоёр жил хүртэлх хугацаагаар хойшлуулна гэж заасан байдаг ч Г. Маралмаагийн хувьд онц хүнд гэмт хэрэгт буруутгагдаж байгаа учраас түүний ялыг хойшлуулах, суллах ямар ч боломжгүй гэдгийг албаны эх сурвалжууд мэдэгдэж байсан билээ.