Афганистан дахь “Талибан”-чууд АНУ-ын онгоцыг сөнөөсөн гэжээ

Агаарын экспедицийн 455 дугаар жигүүрийн “F-16” сөнөөгч онгоц өчигдөр хөөрөх үедээ осолдож, Афганистаны Баграм агаарын цэргийн баазын ойролцоо сүйрсэн гэж Афганистан дахь АНУ-ын хүчин мэдэгдэв. Баграм нь Афганистаны нийслэл Кабул хотоос хойш 50 км зайтай оршдог бөгөөд тус улс дахь АНУ-ын цэргийн гол бааз бөгөөд тус баазыг америкчууд 14 жил ашиглаж байгаа аж. Осолдох үед онгоцноосоо шидэгдсэн нисгэгчийг эвслийн хүчнийхэн аварч, Баграм дахь эмнэлэгт хүргэсэн тухай мэдэгдэлд дурджээ.Сөнөөгч онгоц руу гал нээж, сөнөөснөө “Талибан” бүлэглэлийн босогчид мэдэгдсэн байна. Гэвч АНУ-ын хүчний мэдэгдэлд сөнөөгч онгоц дайсны галд өртөж сүйрээгүй, албаны хүмүүс сүйрлийн шалтгааныг тодруулна гэжээ.