“Үйлчин бүсгүй-2016” үндэсний анхдугаар чуулган болно

“Ахуйн үйлчилгээний хөгжил судалгааны нийгэмлэг” ТББ-аас санаачилан Хөдөлмөрийн яамны ивээл дор “Үйлчин бүсгүй-2016” буюу “Үйлдвэрлэгчдийн сэтгэлгээний хувьсал” үндэсний анхдугаар чуулган энэ оны дөрөвдүгээр сарын 09-ны өдөр буюу Бямба гарагт 09.30-14.00 цагт МҮЭСТО-нд зохион байгуулагдах гэж байна.

Үндэсний анхдугаар чуулганы гол зорилго нь оёдлын аж үйлдвэрийн хөгжлийн тулгамдсан асуудлыг хэлэлцэж, хэтийн бодлогын үндэслэл, чиглэлийг улам тодорхой болгох санал санаачилга дэвшүүлж, хэрэгжүүлэх шийдлийг боловсруулж, үйлдвэрлэгчдийн сэтгэлгээний хувьсгалыг эхлүүлэх аж.

Чуулганы арга хэмжээнд Монгол Улсын Ерөнхийлөгч Ц.Элбэгдорж, УИХ-ын гишүүн М.Батчимэг, УИХ-ын гишүүн, Хөдөлмөрийн сайд Г.Баярсайхан, ЭМСЯ-ны Төрийн нарийн бичгийн дарга С.Ламбаа нар оролцон үг хэлж, баяр хүргэх юм байна. Мөн чуулганы асуудалтай холбоотой илтгэл хэлэлцэж, нийт оёдлын салбарынхан бичил бизнес эрхлэгчид хандаж зөвлөмж хүргэх бөгөөд Төр засгийн удирдлагад хандаж уриалга гаргаад зогсохгүй оёдлын салбарын тэргүүний ажилтнуудыг шагнах ёслол болох юм байна.

“Үйлчин бүсгүй-2016” үндэсний анхдугаар чуулганд Улаанбаатар хотын есөн дүүрэг болон 21 аймгийн үйлчин бүсгүйчүүд оролцох бөгөөд одоогоор 1000 үйлчин оролцох тооцоо гарсан байна.

Чуулганы ерөнхий ивээн тэтгэгчээр “СҮҮ” хувьцаат компани, “Өгөөж-чихэр боов” ХХК, “Монос” групп, “BatZuu” мongolian uniform, “Билгүүн хонгор” ХХК, “НАНУТО” ХХК ажиллаж байна.