ЗАЛУУЧУУДЫН ХӨГЖЛИЙН ТӨВ НЭЭЛТТЭЙ ХААЛГАНЫ ӨДӨР ЗОХИОН БАЙГУУЛЛАА

Хан-уул дүүргийн Нацагдоржийн 2 дугаар салбар номын сангийн 2 давхарт байрлах дүүргийн Залуучуудын хөгжлийн төв өнөөдөр  нээлттэй хаалганы өдөрлөг зохион байгууллаа.

Өдөрлөг нь ХУД-ийн Залуучуудын хөгжлийн төвийн зорилго, үйл ажиллагааг өвсөр үе, залуучууд, олон нийтэд таниулахад чиглэсэн байна.

Швейцарийн хөгжлийн агентлаг, Люксембургийн Засгийн газар, НҮБ-ын Хүн амын сангийн санхүүгийн дэмжлэгтэйгээр Монгол улсын Засгийн газар НҮБ-ын Хүн амын сан хамтран хэрэгжүүлж буй “Залуучуудын хөгжил 2013-2017” төслийн хамгийн гол бүрэлдэхүүн хэсэг нь Залуучуудын хөгжлийн төв байгуулах зорилт юм. Хан-Уул дүүргийн Залуучуудын хөгжлийн төв нь Монгол улсад байгуулж буй 16 төвийн нэг юм.

Залуучуудын хөгжлийн төв нь залуу хүмүүст үе тэнгийнхэнтэйгээ уулзаж нэг нэгнээсээ суралцах, ажлын байранд шаардагдах ур чадвар олж авахад туслах сургалтууд зохион байгуулахаас гадна бэлгийн болон нөхөн үржихүйн эрүүл мэндийн чиглэлээр зөвлөгөө өгөх юм. Мөн өөрийн эрх ашигт хамаатай асуудлуудад идэвхтэй оролцох замаар ирээдүйгээ тодорхойлж, амьдралын чанараа дээшлүүлэхэд туслах бусад үйлчилгээг үзүүлдэг байна.