“Бүү март”-ыг битгий март

Монгол Улс дэлхийн түүхэнд анх удаа ардчилсан хувьсгалыг тайван замаар хийснээрээ олон улсад жишиг болсон. 1990 оны цагаан морин жилийн ардчилсан хувьсгалыг ухаалгаар шийдэж, зөв гарцыг олж харсан хүн нь тухайн үеийн удирдагч Ж.Батмөнх гуай байсныг түүхчид онцлон тэмдэглэсэн нь бий. “Хүмүүн фильм”-ийн уран бүтээлчид Монголын улс төр, нийгмийн зүтгэлтэн түүний ажил, амьдралаас сэдэвлэн хийсэн “Бүү март” түүхэн уран сайхны кино энэ баасан гаригт нээлтээ хийх гэж байна.

Киноны гол дүр буюу Ж.Батмөнх агсны дүрд Соёлын тэргүүний ажилтан Н.Төмөрбат, түүний гэргий А.Даариймаад гавьяат жүжигчин Б.Тунгалаг, Ю.Цэдэнбалын дүрд Төрийн шагналт, гавьяат жүжигчин Ц.Төмөрбаатар, Ардын жүжигчин Г.Мягмарнаран, Б.Билгүүн, О.Анужин нар тогложээ. Кино 1974-1996 оны хоорондох үйл явдлаар өрнөх ба зохиолч, ерөнхий продюссераар Ж.Мөнхбат, ерөнхий зураглаачаар АНУ-ын Крис Мартин, дууны найруулагчаар ОХУ-ын Михайл Жуков, нүүр хувиргагчаар БНХАУ-ын Хон Лу нар ажилласан нь онцлог болсон. Хуучин нийгмийн сүүлчийн удирдагч Жамбын Батмөнх агсны бодит амьдралаас сэдэвлэн бүтээсэн “Бүү март” киног битгий мартаарай хэмээн уран бүтээлчид хэллээ.