Элчин сайд Б. Дэлгэрмаа ОХУ-ын Ерөнхийлөгч В.В.Путинд Итгэмжлэх жуух бичгээ өргөн барилаа

Монгол Улсаас Оросын Холбооны Улсад суух Онц бөгөөд Бүрэн эрхт Элчин сайд Банзрагчийн Дэлгэрмаа тус улсын Ерөнхийлөгч Владимир Владимирович Путинд Итгэмжлэх жуух бичгээ энэ сарын 20-ны өдөр өргөн барив. Итгэмжлэх жуух бичиг барих ёслолын ажиллагаа Кремлийн Их ордоны Александр танхимд болов.

ОХУ-ын Ерөнхийлөгч В.В.Путин Элчин сайд Б.Дэлгэрмаад ИЖБ-ээ барьж буйтай нь холбогдуулан баяр хүргэхийн хамт Монгол Улстай эртний, найрсаг хөршийн, стратегийн түншлэлийн харилцаандаа сэтгэл хангалуун буйгаа тэмдэглээд “Саяхан байгуулсан ОХУ, Монгол Улсын хооронд Стратегийн түншлэлийг хөгжүүлэх дунд хугацааны хөтөлбөрийг хэрэгжүүлэх нь хоёр орны харилцааг цаашид өргөжүүлэн хөгжүүлэхэд чухал. Энэ оны 6 дугаар сард Ташкент хотноо болох Шанхайн хамтын ажиллагааны байгууллагын дээд хэмжээний уулзалтын үеэр Монгол Улсын Ерөнхийлөгч Ц.Элбэгдоржтой хоёр талын харилцааны талаар үргэлжлүүлэн ярилцах бөгөөд ОХУ, Монгол Улс, БНХАУ-ын гурван талт дээд хэмжээний уулзалт мөн төлөвлөгдсөн байгаа” хэмээн онцлон тэмдэглэв.

Элчин сайд Б.Дэлгэрмаа Монгол Улсын Ерөнхийлөгч Ц.Элбэгдоржийн мэндчилгээг ОХУ-ын Ерөнхийлөгч В.В.Путинд уламжлаад Улаанбаатар хотноо энэ оны 7 дугаар сард зохион байгуулагдах Ази, Европын орнуудын дээд хэмжээний уулзалтад оролцохыг урив. Түүнчлэн Элчин сайд Б.Дэлгэрмаа хоёр орны хооронд тогтсон уламжлалт, найрсаг харилцааг бүхий л түвшинд идэвхжүүлэх, хамтын ажиллагааг гүнзгийрүүлэн хөгжүүлэхийн төлөө ажиллах болно гэдгээ илэрхийлэв.