Өмнөд Солонгос, АНУ хоёр хамтарсан цэргийн сургуулилт хийнэ

Өмнөд Солонгос болон АНУ-ын арми “Max Thunder” гэдэг нэртэй агаарын цэргийн хамтарсан сургуулилт хийхээр болсон тухай Өмнөд Солонгосын Батлан хамгаалах яам мэдээлсэн байна. “Дөрөвдүгээр сарын 29 хүртэл үргэлжлэх сургуулилтын гол зорилго нь байлдааны явцад холбоотнуудын хамтран ажиллах тактикийг боловсруулах явдал юм” гэж тус яам онцлон тэмдэглэжээ. Дээрх сургуулилтыг 2009 оноос хойш жилд хоёр удаа явуулдаг бөгөөд энэ жилийн сургуулилтанд Америкийн 1200 орчим, Өмнөд Солонгосын 640 цэрэг, тус улсын F-15K, KF-16, FA-50 болон Америкийн F-16 сөнөөгч онгоцууд зэрэг 100 орчим сөнөөгч онгоц оролцох бөгөөд сургуулилтын явцад холбоотнуудын байлдааны онгоцууд хоёр бүлэгт хуваагдаж, дайн дэгдсэн нөхцөлд хамтран ажиллах төрөл бүрийн тактикийг боловсруулах аж.