Төвийн бүсийн залуучууд Дархан хотод чуулж байна

Монголын Залуучуудын Холбоо НҮБ-ын Ардчиллын Сантай хамтран хэрэгжүүлж буй “Эрхээ идэвхжүүлье: Залуучуудын оролцоо” төслийн хүрээнд 2016 оны УИХ-ын болон орон нутгийн сонгуульд залуучуудын оролцоог нэмэгдүүлэх бүсийн чуулгануудыг зохион байгуулж байгаа билээ. Анхны чуулган баруун бүсээс эхэлж Ховд, Баян-Өлгий, Говь-Алтай, Увс аймгийн залуус Улаангом хотноо чуулсан бол Хангайн бүсийн залуус Архангайд чуулж өвөрхангай, завхан, баянхонгор аймгийн залуус дуу хоолойгоо нэгтгэсэн юм. Тэгвэл энэ удаад төвийн бүсийн залуучуудын чуулган Дархан хотод энэ сарын 24, 25-ны өдрүүдэд болж байна. Сонгуульд залуучуудын идэвх оролцоог нэмэгдүүлэх, тэдний хүсэл эрмэлзлэлийг төлөөлж чадах сонгуулийн үр дүнг бататгах, залуучуудын үүрэг оролцоог орон нутгийн болон үндэсний шийдвэр гаргах түвшинд дээшлүүлэх зорилготой уг чуулганд Хөвсгөл, Сэлэнгэ, Орхон, Дархан-Уул аймгийн залуус оролцлоо. Чуулганы үндсэн илтгэлийг МЗХ-ны ерөнхийлөгч А.Мөнхбат танилцуулсан бөгөөд тэрээр илтгэлдээ “Монголын залуучууд төрийг цэвэрлэх, хулгайчдыг арилгах үйл хэрэгт гар бие оролцож оролцоогоо нэмэгдүүлэх нь хамгийн чухал” хэмээн онцоллоо. Үүний дараагаар аймаг бүр баг болон хуваагдаж залуучуудын оролцоог нэмэгдүүлэх ажил хэрэгч даалгавраар өрсөлдсөн юм. Мөн чуулганы үеэр МЗХ-ны ерөнхийлөгч А.Мөнхбат Дархан хотын томоохон зах худалдааны төвүүдээр орж, иргэд залуучуудтай уулзаж санал бодлоо солилцсон юм. Түүнчлэн “Хулгайчгүй Монгол” хөдөлгөөн болон Хар, Цагаан жагсаалтын талаар Дархан хотын иргэдэд мэдээлэл хүргэж, чөлөөт уулзалт зохион байгууллаа. Энэ үеэр иргэд “Хулгайч нар төрийн мөнгө идэхээс гадна бидний эрүүл мэнд, оюун санаа, эх орныг минь хулгайлж байна. Тиймээс “Хулгайчгүй Монгол” хөдөлгөөн бол цаг олсон үйл ажиллагаа боллоо. Бид бүхий л талаар залуучуудаа дэмжин ажиллана” гэдгээ илэрхийлж байлаа. Төвийн бүсийн чуулган өнөөдөр иргэний оролцоо түүний хэлбэр, орон нутгийн түвшинд иргэдийн оролцоо, өнөөгийн байдлын талаар илтгэл хэлэлцүүлгүүд явагдаж сонгогчдын боловсрол, иргэний оролцоо, эрх үүргийн талаархи сургалтуудаар хоёр дахь өдрөө үргэлжилнэ.