Пхеньянд хорио тогтоолоо

БНАСАУ-ын Хөдөлмөрийн намын их хурал болох гэж байгаатай холбогдуулан Пхеньян хотод хорио тогтоож, хурим найр хийх болон оршуулгын ёслол үйлдэхийг хориглолоо. Умард Солонгосын удирдагч Ким Жөн Уны тэргүүлсэн Хөдөлмөрийн намын их хурал энэ баасан гарагт болох гэж байна. Хурим, оршуулгаас гадна Пхеньян руу орох, хотоос гарах хөдөлгөөнийг хориглож, байшин барилгад хийх хяналт шалгалтыг өргөжүүлсэн байна гэж Умард Солонгост эх сурвалжтай “Daily NK” сонинд мэдээлжээ. Эдгээр түр арга хэмжээнүүд нь их хурлын үеэр ямар нэгэн эрсдэл гарахаас урьдчилан сэргийлэх зорилготой юм хэмээн Өмнөд Солонгосын Эх орноо нэгтгэх яамны хэвлэлийн төлөөлөгч Чон Жүн Хи мэдэгдсэн байна.