ОХУ, БНХАУ хоёр цэргийн хамтарсан сургуулилт хийнэ

БНХАУ,ОХУ хоёр энэ сард компьютерын тусламжтайгаар пуужингийн довтолгооноос хамгаалах системийн сургуулилтыг хийнэ гэж ОХУ-ын Батлан хамгаалах яамны хэвлэлийн алба мэдэгджээ. Хоёр улс “Агаар, сансрын аюулгүй байдал 2016” гэдэг нэрийн дор компьютер ашиглах команд-штабын хамтарсан сургуулилтыг ОХУ-ын Батлан хамгаалах яамны Сансрын батлан хамгаалах хүчний Судалгааны төв хүрээлэнгийн байранд энэ сард зохион байгуулахаар болсон гэж мэдэгдэлд дурдсан байна. Энэ удаагийн сургуулилтын зорилго нь баллистик болон далавчит пуужингийн санамсаргүй болон өдөөн хатгасан цохилт, халдлагаас хамгаалах зорилгоор хоёр орны агаарын болон пуужингийн довтолгооноос хамгаалах цэргийн хүчний үйл ажиллагааг уялдуулан зохицуулах явдал юм гэж яам мэдэгдээд “уг сургуулилт гуравдагч орны эсрэг чиглэсэн ажиллагаа биш болохыг” дурджээ.