2000 жилийн өмнөх морин уралдааны дүрэм бүхий самбар олджээ

Писидийн эрин үед залуу насандаа өөд болсон Лукоянус гэдэг унаачийн дурсгалд зориулсан хөшөөний нэг хэсэг болох энэхүү самбар Туркийн Төв Анатолийн бүсийн Конья хотын Бейшехир дүүргээс олджээ. “Энэ газарт морин тойруулга байсан. Уг самбар Ромын Лукоянус гэдэг нэртэй унаачтай холбоотой бөгөөд үүнээс уламжлан бид энд морин уралдаан болж, адууны аж ахуйг эрхэлж байсныг илүү тодорхой мэдэж болох юм. Эртний Анатолийн хүмүүс болох хитчүүд ариун гэж үздэг уулсаа тойруулан ийм хөшөөнүүд босгож байсан” гэж Сельчук их сургуулийн түүх судлалын танхимын профессор Хасан Бахар ярьсан байна. Энэ самбар дээр бичсэн морин уралдааны дүрэм ёсоор, нэгдүгээр байрт орсон морь өөр уралдаанд оролцож болохгүйгээс гадна түрүүлсэн морины эзний өөр нэг ч морь мөн адил бусад уралдаанд оролцох ёсгүй. Ингэснээр бусдад ялах боломж олгодог байж. Энэ бол эрт дээр үед морин уралдааныг шударгаар явуулдаг байсныг харуулсан гайхалтай сайн дүрэм хэмээжээ.