Монголын дипломатчид тамхины наймаанд холбогджээ

Өнгөрсөн  бямба гаригт Украйн улсын  хил дээр Монгол Улсын дипломат паспорттой хоёр хүн саатуулагдсантухай эх сурвалжууд мэдээлж байна. Тэд “Монгол Улсын дипломат паспорт, дипломат ачааг саадгүй нэвтрүүлэхийг хүссэн” Москва дахь Монгол Улсын Элчин сайдын яамны албан бичигтэй ачаа тээвэрлэж явсан байна.  Украйны хилийн албанд ” Монголчууд хууль бус ачаа тээвэрлэж яваа” гэсэн мэдээлэл ирсний  дагуу шалгалт хийж найман хайрцаг  тамхи илрүүлжээ. Хайрцаг болгон дээр “энэ сарын 29-ний өдөр болох Монгол Улсын Их хурлын сонгуулийн ажлын материал, техник хэрэгсэл” гэсэн тэмдэглэгээ тавьсан байсан аж. Монгол Улсын хилээр “дипломат ачааг саадгүй нэвтрүүлэх” гэсэн тамга тэмдэгтэй бол ямар ч асуудалгүйгээр  шууд нэвтрүүлэх ёстой. Сонгуульд ашиглах баримт бичиг, техник гэсэн нэрийн дор   хууль бус бараа бүтээгдэхүүнийг ийнхүү  өнгөлөн далдалж оруулдаг байж болзошгүй. Зөвхөн тамхи гэлтгүй хар тамхи, мансууруулах төрлийн бодис ч ийм байдлаар  Монгол Улс руу орж гардаг байх магадлалтай. Хэрэв Украйны хилийн албанд хууль бус бараа гэсэн мэдээлэл ирээгүй бол  “дипломат” гэдгээр халхавчлан 29145 хайрцаг тамхи Монголын хилээр орж ирэх байжээ. Украйны хилийн албанаас  Монгол Улсын дипломат паспорттой хоёр хүнд эрүүгийн хэрэг үүсгэн шалгаж эхэлснээ мэдээлжээ. Ер нь дипломат паспорттой иргэд хууль бус бараа тээвэрлэж байгаад Оросын гаальчдад баригдсан нь бий. Энэ удаа ч бас дипломатчид ноцтой хэрэг өдүүлэв бололтой.