АСЕМ-ын сайн дурынхны өдрийг тэмдэглэлээ

АСЕМ-ын Бэлтгэл Ажлын алба, Сайн Дурынхны Штабаас санаачлан АСЕМ-ын “Сайн дурынхны өдөр”-ийг 6 дугаар сарын 24-нд Хан-Уул дүүрэгт байрлах Crocus Event Hall-д тэмдэглэн өнгөрүүллээ.

Монгол Улсад анх удаа зохиогдож байгаа олон улсын томоохон үйл явдал болох АСЕМ-ын Дээд түвшний 11 дүгээр уулзалтын зохион байгуулалтад сайн дураар ажиллахаар бүртгүүлж, зохих сургалтуудад сууж бэлтгэгдсэн 800 орчим оюутан залуусыг танилцуулах, тэдний идэвх санаачилгыг алдаршуулах, АСЕМ-ын ажлын хэсгүүдэд албан ёсоор хүлээлгэн өгөхөд уг арга хэмжээний зорилго оршиж байв.

Энэ үеэр “АСЕМ-ын сайн дурынхан ярьж байна” “АСЕМ-ын сайн дурынхныг алдаршуулах ёслолын ажиллагаа”, “АСЕМ-ын сайн дурынхны үдэшлэг” гэсэн 3 цуврал арга хэмжээ болсон бөгөөд  Ерөнхий сайдын зөвлөх, АСЕМ-ын Бэлтгэл ажлын албаны зөвлөх М.Есөнмөнх, Ерөнхийлөгчийн ОНХБ-ын зөвлөх А.Ганбаатар нар лекц уншиж, нэр бүхий зочид төлөөлөгчид олон улсын томоохон арга хэмжээний зохион байгуулалтын туршлагаас хуваалцлаа.

2016 оны 3 дугаар сараас АСЕМ-ын сайн дурынхныг бэлтгэх ажил эхэлсэн бөгөөд Монголын хүүхдийн ордонд Сайн дурынхны штаб ажиллаж байна. Өнгөрсөн хугацаанд сайн дурын ажилтан бэлтгэх гурван шатны 36 цагийн сургалт явуулж, тэднийг шуурхай зохион байгуулахын тулд Чингис хааны үеийн цэргийн зохион байгуулалтаас сэдэвлэн “Тавьт”, “Аравт”-ын багт хуваарилан ахлагч нарыг томилж удирдлага, чиглэлээр хангаж ажиллаж байна.

АСЕМ-ын Сайн дурын албанд 22 их дээд сургуулиас 16-35 насны 1100 гаруй оюутан бүртгүүлснээс 140 гаруй нь  Ази-Европын Парламентын түншлэлийн 9 дүгээр уулзалт, АСЕМ-ын Ахлах албан тушаалтнуудын уулзалт болон Сангийн сайд нарын 12 дугаар уулзалтын зохион байгуулалтад оролцож, үүргээ амжилттай гүйцэтгээд байна.

Аливаа нийгмийн хөгжлийн салшгүй нэг хэсэг бол олон нийтийн оролцоог хөхиүлэн дэмжих явдал юм. Тэр тусмаа оюутан залуусын оролцоотой сайн дурын үйл ажиллагаа нь нийгэмд илүү их өгөөж авчирдаг төдийгүй тухайн хүний хувьд өөрийгөө нээн хөгжүүлэх боломжийг олгож байдгаараа онцлогтой.

Манай улсад сайн дурынхны хөдөлгөөн үүсээд 25 жил болж байгаа бөгөөд АСЕМ-ын уулзалтын дараа олон улсын арга хэмжээ зохион байгуулах туршлага бүхий анхны сайн дурын томоохон баг бий болж үлдэх нь хамгийн том ололт юм гэж мэргэжилтнүүд уг арга хэмжээний үеэр онцоллоо.