Ерөнхий сайд Сүхбаатар аймгийн ИТХ-ын хууль бус шийдвэрийг баталж, баяр наадмыг бужигнаан болголоо

Сүхбаатар аймгийн баяр наадам өнөөдөр албан ёсоор эхэлж байна. Харин аймгийн ИТХ нь хэл амаа ололцохгүй бужигнаантай байна. Тус аймагт ИТХ нь 33 төлөөлөгчөөс бүрддэг. Сонгуулийн дүнгээр АН-ын 16, МАН-ын 16 төлөөлөгчтэйгээр тэнцэж, нэг тойрогт маргаантай асуудал нь шүүхээр шийдэгдэж, 9 сард нөхөн сонгууль явуулахаар болоод байгаа. Тэгвэл ИТХ дахь МАН-ын бүлэг нь тамга, тэмдэггүй хууль бус албан баланкан дээр Засаг даргад З.Энхтөр гэдэг хүнийг томилуулахаар Ерөнхий сайдад илгээснийг батламжилж Засаг даргыг томилуулах, чөлөөлөх тушаалыг өнөөдөр өглөө ирүүлжээ. Аймгийн ИТХ дахь МАН-ын бүлэг 11 цагт аймгийн МАН-ын дэд дарга Засаг дарга Ж.Батсуурьтай уулзая хэмээн өрөөнд нь цуглаад дээрх тушаалыг уншиж, “Тамга өгөөдөх, өрөөгөө яг одоо сулла” гэхчлэн бужигнаан үүсгэв. Ж.Батсуурь хууль бусаар очсон албан бичиг ч гэлээ нэгэнт Ерөнхий сайд тушаал гаргасан бол хүндэтгэлтэй хандаж, хүлээж авч байна. Өнөөдөр баярын өдөр Тамгын газрын дарга, ажилтнууд наадмын комиссын ажилд, зарим нь амралтын байдалтай тараад явсан хойгуур тушаалыг гэнэт хүлээж авч байна. Иймд тушаалыг өнөөдөр хүлээж авснаа мэдэгдэе, Тамгыг даваа гаригт аймгийн нутгийн ордны ёслол хүндэтгэлийн танхимд хамт олноо цуглуулж тэднийхээ өмнө хүндэтгэлтэй гардуулж өгье. Харин одоо та бүхнээс хэдэн асуулт асуумаар байна гээд нэгдүгээрт, бид хууль дор хуулиа дээдэлж мөрдөж ажиллах ёстой, аймгийн ИТХ-ын анхдугаар хуралдаан хууль бус болсон, иймд Ерөнхий сайд руу явсан албан бичиг ямар баланкан дээр, ямар тамга тэмдэгтэй явсныг асууя. Хоёрдугаарт, Ерөнхий сайдын тушаалыг нэг намын дэд дарга уншиж танилцуулдаггүй санагдана. Тиймээс гайхаж байгаагаа асууя. Гуравдугаарт, Засаг даргын ажлыг авах гэж яаран сандчиж байгаа З.Энхтөр та Засаг захиргааны нэгж, түүний удирдлагын тухай хуулийн 25.5.2-т заасанчлан Засаг даргад нэр дэвшигч нь төрийн албанд гурван жил ажилласан байх гэсэн шалгуурыг хангасан уу гэдгийг асууя” гэв. Аймгийн ИТХ дахь МАН-ын гишүүд асуултанд хариулсангүй уурлаж гарч явцгаасан ч удалгүй буцан ирж Засаг даргын өрөөнд орж гарч тамга тэмдэг одоо өг гэлцэн хэрүүл шуугиан тарьж байна.

Л.Бэх