Давхардсан олон баяр цэнгүүн зохион байгуулахгүй байхыг уриаллаа

Хэдхэн хоногийн дараа шинэ он гарах гэж буйтай холбоотой шинэ жилийн уур амьсгал орж, оны шилдгүүдийг шалгаруулах томоохон цэнгүүн, баяр ёслолын арга хэмжээний зар энд тэндгүй харагдана. Харин үүний хажуугаар сошиал ертөнцөд багагүй давалгаа үүсгэсэн нэгэн уриалга олон нийтийн анхаарлыг ихэд татаад амжлаа.

Энэ нь Монголын Залуучуудын Холбооноос гаргасан уриалга байсан юм. Уг уриалгад “Монголын Залуучуудын Холбоо нь залуучуудын төв байгууллагынхаа хувьд нийт албан байгууллага төрийн болон төрийн бус байгууллагуудад хандан давхардсан олон баяр цэнгүүнийг зохион байгуулахгүй байх, баярын үеэр архидан согтуурснаас болж хүний амь нас, эрүүл мэнд хохирох эрсдлээс урьдчилан сэргийлнэ үү хэмээн уриалж байна” гэжээ.

Мөн 12-р сарын дундаас цаг агаар огцом хүйтэрч, нийт нутгаар олон жилийн дунджаас хүйтэн байх, өвөлжилт хүндэрч болзошгүй талаар цаг уурын байгууллагаас мэдэгдээд байгаа, мөн улс орны хэмжээнд эдийн засгийн байдал хүндэрч, хэмнэлтийн горимд шилжих зайлшгүй шаардлага тулгараад байгаа энэ үед 2016 оны “Next stop” Оны залуу шалгаруулах ёслолын арга хэмжээг зохион байгуулахгүй болсныг албан ёсоор мэдэгджээ.

Энэхүү уриалга мэдэгдлийн дагуу МЗХ-ны бүхий л шатны салбар холбоо, тусгай салбар нэгж, зөвлөлүүд олон нийтийг хамарсан томоохон арга хэмжээг зохион байгуулахааргүй болсон байна.

Нээрээ л улс орны эдийн засаг сайнгүй байгаа талаар дээр дооргүй шуугиж байгаа энэ үед Залуучуудын байгууллагын уриалга нүдээ олсон ч  юм  шиг.