С.Батболд: ”Аз жаргалтай хот” цэнгүүнийг НЗДТГ-аас зохион байгуулаагүй

“Хар сарнай” хамтлагийн дуучин С.Амармандах энэ сарын 22-ны өдөр “Аз жаргалтай Улаанбаатар” цэнгүүнд оролцож, дуулсны дараа ОХУ-ын дипломатчид зодуулж, хүнд гэмтсэн нь дуулиан дэгдээд байгаа билээ.

Зарим хэвлэлүүдэд мэдээлж байгаачлан хотын удирдлагуудын урилгаар Амараа тус цэнгүүнд дуулсан гэх мэдээлэл бий. Учир нь “Аз жаргалтай Улаанбаатар” цэнгүүнийг Нийслэлийн Засаг даргын Тамгын газраас зохион байгуулж, ОХУ, БНХАУ-ын ЭСЯ-ны дипломат төлөөлөгчид оролцуулсан гэх мэдээлэл цацагдаад байгаа юм.

Тэгвэл энэ талаар хотын дарга С.Батболд өчигдөр орой “Eagle” телевизээс бэлтгэн хүргэдэг “Бадарчийн Жаргалмаа” нэвтрүүлэгт оролцох үеэрээ, “Фэйсбүүкээр явж байгаа “Аз жаргалтай хот” гэх тус цэнгүүнийг НЗДТГ-аас зохион байгуулаагүй. Төрийн бус байгууллагаас зохион байгуулж, намайг урьж оролцуулсан. Нийслэлд тиймэрхүү цэнгүүн зохион байгуулах төсөв байхгүй″ гэх тайлбарыг албан ёсоор өглөө.

Тэгэхээр иргэдийн дунд бий болсон нийслэлийн удирдлагууд төсвийн хөрөнгөөр баяр тэмдэглэж, түүний уршгаар дуучин С.Амармандах зодуулж бэртсэн гэх ойлголт эндүүрэл бололтой.