Учир битүүлэг шалтгаанаар таван иргэн амиа алдлаа

Өчигдөр цагдаагийн байгууллагад 12:10 цагийн үед Баянгол дүүргийн хоёрдугаар хорооны нутаг дэвсгэрт хордсон иргэн байна гэх дуудлага иржээ. Үүнээс хойш 20:40 цаг хүртэл нийт таван иргэн хордсон гэх дуудлага ирсэн байна.

Энэ талаар Улаанбаатар хотын цагдаагийн газрын дарга Ж.Эрдэнэболд “Цагдаагийн 102 дугаарын утсанд ирсэн “Баянгол дүүргийн хоёрдугаар хороонд таван иргэн хордож, нас барсан” гэх дуудлагын холбогдох шалгалтын ажиллагааг явуулж байна. Урьдчилсан байдлаар эдгээр иргэд хамтдаа байхдаа нэг зүйлээс хордсон байж болзошгүй гэж мэдээллээ.

Хэргийн газраас хураасан эд мөрийн баримтыг шүүхийн шийдвэрийн үндэсний хүрээлэнд шинжилж байна. Мөн нас барсан иргэдийн үхлийн шалтгааныг тогтоохоор ажиллаж байна. Одоогийн байдлаар юунд хордсон нь тогтоогдоогүй байна.

Мэргэжлийн байгууллагууд эдгээр иргэдийг архи согтууруулах ундаанд хордсон байж болзошгүй гэж таамаглаж байна. Иймд мэргэжлийн байгууллагуудын дүгнэлт, шийдвэр гартал иргэд та бүхэн архи согтууруулах ундаа бүү хэрэглээрэй” гэв.

Харин Нийслэлийн мэргэжлийн хяналтын газрын дарга Л.Эрдэнэчулуун “Үүссэн нөхцөл байдалтай холбогдуулан Нийслэлийн мэргэжлийн хяналтын газраас одоогоор 247 улсын байцаагч ажиллаж байна. Бид архи согтууруулах ундаа худалдан борлуулдаг, түүгээр үйлчилдэг 761 газрыг хяналт шалгалтад оруулсан. Үүнээс сэжиг бүхий 3361 архийг битүүмжилсэн. Мөн 52 дээжийг итгэмжилсэн лабораторид хүргүүлээд байгаа. Маргааш хариу гарна. Тиймээс иргэд хаана үйлдвэрлэсэн нь тодорхойгүй архи согтууруулах ундаа хэрэглэхгүй байхыг сэрэмжлүүлж байна” гэв.

Түүнчлэн Нийслэлийн Эрүүл мэндийн газрын дарга Л.Төмөрбаатар “Та бүхний орчимд архи согтууруулах ундаа хэрэглээд хордсон хүн байвал яаралтай 103 дугаарт залгаж, тусламж аваарай” гэлээ.

Дашрамд дурдахад, баттай бус эх сурвалжийн хэлж буйгаар нас барсан иргэд орцны жижүүрүүд аж. Тэд “Мөнхжин-Од” ХХК-ийн үйлдвэрлэдэг “Найрсаг” гэх архинд хордсон байж болзошгүй гэнэ.