Хохирогчид архины шил, лааз цуглуулж амжиргаагаа залгуулдаг байжээ

2017 оны 01-р сарын 17 өдөр, 17 цаг 11 минутад нийтэлсэн (Сэтгэгдэл үлдээх )
6342

Баянгол дүүргийн хоёрдугаар хорооны нутаг дэвсгэрт 5 хүн хордож нас барсан хэрэг өчигдөр гарсантай холбогдуулан Ажлын хэсэг байгуулсан. Ажлын хэсгээс хохирогчид юунаас болж хордсон талаар дөнгөж сая мэдээлэл хийлээ.

Нийслэлийн засаг даргын орлогч Г.Батбаясгалан шүүх шинжилгээний эцсийн дүгнэлт гарах хүртэл буюу 2017.01.17-ны өдрийн 18.00 цагаас 2017.01.20-ны өдрийг дуусах хүртэл архи, согтууруулах ундаа худалдах, түүгээр үйлчлэхийг бүрэн хориглох шийдвэр гаргасныг танилцуулсан бол Улаанбаатар хотын цагдаагийн газрын дарга Ж.Эрдэнэбат талийгаачдыг шингэн зүйл ууж хордсон болох нь эхний дүгнэлтээр тогтоогдсон. Гэхдээ яг ямар найрлагатай бодисонд хордсонныг тогтооход тодорхой хугацаа шаардлагатай болохыг хэллээ. Таван хүний амь нас эрсэдсэн хэрэг гарсантай холбогдуулан архи үйлдвэрлэгчид, түүгээр үйлчилдэг аж ахуйн нэгжүүдэд шалгалт хийж, бүтээгдэхүүний дээжээс шинжилгээ аваад байгаа.

Хэргийн газраас “Найрсаг” архины шил, Гайхмаараа шил арчигч шингэн зэргийг хураан авч шинжилгээнд явуулаад байгаа. Түүнчлэн хэрэг болсон газрын ойр орчимд шил лааз цуглуулдаг хүмүүс хэсэг бүлгээрээ цугладаг бөгөөд тэндээс 3-4 өөр архи үйлдвэрлэгч компанийн архины шил олдсон байна.

Хохирогчдын нэг нь тус байрны орцны жижүүр хийдэг, подвальдаа амьдардаг нэгэн байсан бол бусад нь архины шил, лааз цуглуулж амжиргаагаа залгуулдаг, тус орцны хонгилоор тогтмол орж гардаг хүмүүс байжээ. Нийт ард иргэддээ зөвлөхөд гарал үүсэл тодорхойгүй, хаяг шошгын алдаатай, хямд үнэтэй бүтээгдэхүүнийг худалдан авч амь нас, эрүүл мэндээ эрсдэлд оруулахгүй байхыг анхааруулья.

Танд таалагдаж байвал LIKE хийгээрэй. Баярлалаа

АНХААРУУЛГА: Уншигчдын бичсэн сэтгэгдэлд ОНЦЛОХ.МН хариуцлага хүлээхгүй болно. ОНЦЛОХ.МН сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл үлдээх