Энэ сарын 20-ныг дуустал архи, согтууруулах ундаа худалдаалах, түүгээр үйлчлэхийг хориглолоо

Баянгол дүүргийн хоёрдугаар хороонд өчигдөр нэр бүхий иргэд хордсон байж болзошгүйгээр амь насаа алдсан. Нийслэлийн Засаг даргын зөвлөлөөс яаралтай арга хэмжээ авч ажлын хэсэг байгуулан өнөөдөр шуурхай мэдээлэл өглөө. Амь насаа алдсан хүмүүс шингэн зүйлээс хордсон байгаа нь тогтоогдсон байна. Нийслэлийн Засаг даргын зөвлөл өргөтгөсөн байдлаар хуралдаад үүссэн нөхцөл байдалтай холбогдуулан өнөөдрийн 18:00 цагаас эхлэн энэ сарын 20-ныг дуустал нийслэлийн нутаг дэвсгэрт архи, согтууруулах ундаа худалдаалах түүгээр үйлчлэхийг хориглолоо.

Тус ажлын хэсгийн ахлагч Ж.Батбаясгалан “Шуурхай ажлын хэсэг нийслэлийн Иргэдийн төлөөлөгчдийн хурлын Тэргүүлэгчдэд танилцуулсны дагуу тодорхой шийдвэрүүдийг гаргалаа. Уг хэрэг мөрдөн байцаалтын шатанд явж байгаа учир хуулийн хүрээнд мэдээлэл хүргэж байна. Шүүх, шинжилгээний байгууллагаас  эцэслэн дүгнэлт гараагүй байгаа. Харамсалтайгаар амь насаа алдсан хүмүүс хордлогын шинж тэмдэгтэй байгаа тул иргэдийнхээ эрүүл мэнд, амь насыг хамгаалах, урдчилан сэргийлэхийн тулд энэ арга хэмжээг авч байна” хэмээв.