Бурхан Халдуныг газрын зурагт тэмдэглэх зорилготой

БУРХАН ХАЛДУН УУЛЫН ЖИНХЭНЭ НЭРИЙГ АЛБАН ЁСООР ДАХИН СЭРГЭЭЖ, МОНГОЛ УЛСЫН ГАЗРЫН ЗУРАГТ ТЭМДЭГЛЭХ ЗОРИЛГОТОЙ

2015 оны 7-р сард ХБНГУ-ын Бонн хотноо болсон Дэлхийн өвийн Хороо /ДӨХ/-ны 39-р чуулганаар “Их Бурхан Халдун уул, түүнийг хүрээлсэн тахилга шүтлэгт газар нутаг” гэсэн соёлын өвийн дурсгалт газрыг Дэлхий дахины хосгүй гайхамшигт үнэ цэнэтэй зүйл мөн гэж үзэж, Дэлхийн соёлын өвийн жагсаалтад бүртгэн авсан. Мөн Дэлхийн соёлын өвд бүртгүүлэх явцад олон улсын шинжээчид Бурхан Халдун уулын нэр нь Монголын газрын зурагт тэмдэглэгдэж байгаагүй төдийгүй, Бурхан Халдуны байршил тодорхойгүй, нэр дэвшүүлж байгаа уул бол Бурхан Халдун гэдэг нь баттай нотлогдохгүй байна гэж үзэж байсан.

Газрын тухай хуулийн 8 дугаар зүйлийн 8.5-т “Газар усны албан ёсны нэрийг зөвхөн Улсын Их Хурал өөрчилнө” гэж тус заасан байдаг. Үүний дагуу УИХ-аар хэлэлцүүлж байна.

Хэнтийн нуруу нь их бага Хэнтийн нуруу гэж салбарладаг. Бага Хэнтийн нурууны ноён оргил нь Асралт хайрхан. Их Хэнтийн нурууны оргилыг Бурхан Халдун гэж нэрлэж ирсэн ч газрын зурагт Хэнтий Хан уул нэрээр тэмдэглэгдсэн 2361,5 м өндөр оргил юм. Зөвхөн энэ оргилын нэрийг л газрын зурагт Бурхан Халдун -Уул гэж тэмдэглэх юм. Хэнтий нурууны нэр өөрчлөгдөхгүй.

Бурхан Халдун Уулыг газрын зурагт албан ёсоор тэмдэглэх нь дэлхийн соёлын өвийн хорооны өмнө хүлээсэн Монгол улсын үүрэг юм.

Тиймээс Бурхан Халдун уулын нэрийн талаар үүсээд байгаа тодорхойгүй асуудлыг нэг мөр шийдэх, Бурхан Халдун уулын жинхэнэ нэрийг албан ёсоор дахин сэргээж, Монгол улсын газрын зурагт тэмдэглэх зорилготой юм.