Ц.Элбэгдорж “ноён” бууж, Н.Энхбаяр “хүү” өгсөх 6-р сар

Монгол улсын ерөнхийлөгчөөр 2 удаа улиран сонгогдож, 8 жил ажилласан дөрөв дэх ерөнхийлөгч Ц.Элбэгдорж гуравхан сарын дараа халаагаа өгч, өндөр сэнтийнээсээ бууна. Энэ бол хөдөлшгүй үнэн. Харин түүний орыг хэн залгамжлах бол гэдэг асуудал. Одоогоор Монгол улсын тав дахь ерөнхийлөгчөөр МАН-аас дэвшсэн хэн ч бай сонгогдоно гэсэн уур амьсгал нийгэмд давамгайлах болсныг нуух аргагүй. МАН-д кандидат олон бий ч, намын дарга М.Энхболд дэвшихээр аль эртнээс зэхсэн гэдгийг олон факт гэрчилнэ. Ялсан намын дарга ерөнхий сайд болдог уламжлалыг эвдэж УИХ-ын даргын суудалд тухалсан. Эндээс ерөнхийлөгчийн сэнтий рүү дөхөх нь илүү ойрхон, илүү хялбар гэж томьёолсон тухай судлаачид дурдсан байдаг. Тэгэхээр Монгол улсын 5 дахь ерөнхийлөгчийн нэр үндсэндээ тодорсон гэж ойлгож болох. Тэр хүн бол Миеэгомбын Энхболд.

Харин М.Энхболд Монгол улсын ерөнхийлөгчөөр сонгогдсоны дараа Монголын улс төрд хүчний хуваарилалтад өөрчлөлт орно гэж улс төр судлаачид шинжилж байна. Нэгдүгээрт, УИХ даргыг шинээр сонгоно. Хоёрдугаарт, эрх баригч намын даргыг сонгоно. Энэ бол өөрчлөлтийн эхийг тавих болно. Намын дарга хэн болохоос хамаарч, Засгийг хэн тэргүүлэх вэ? гэдэг асуудал үүсэх магадлалтай. Ийнхүү улс төрийн хүчний хуваарилалтад ихээхэн өөрчлөлт үүснэ. Үүнтэй зэрэгцээд, М.Энхболдын тойрогт дахин сонгууль зарлана.

Н.Энхбаярыг УИХ-д нэр дэвшихийг хориглосон заалт 2016 оны 9-р сараар дуусгавар болсон тул дахин сонгуульд МАХН-аас Н.Энхбаярыг дэвшүүлэх нь бас эргэлзээгүй. Н.Энхбаяр дэвшвэл ялах магадлал маш өндөр. Тэр жил Багабанди ерөнхийлөгчөөр сонгогдож, түүний тойрогт дахин сонгууль зарлахад Н.Энхбаяр дэвшиж ялалт байгуулж, УИХ-ын гишүүнээр сонгогдож байсан түүх давтагдах магадлалыг хэн ч үгүйсгэж чадахгүй.

Ийнхүү цаг эргэж, шатраар зүйрлэвэл, Элбэгдорж ноён “бууж өгч”, Энхбаяр хүү “бэрс гарах” цаг ойртжээ.

ЭХ СУРВАЛЖ : CONTROL.MN