Эмгэнэл

Батсүхийн Ханддолгор
/1973-2017/

Монгол Улсаас Бүгд Найрамдах Энэтхэг Улсад суугаа Элчин сайдын яамны зөвлөх Батсүхийн Ханддолгор 2017 оны дөрөвдүгээр сарын 17-нд хүнд өвчний улмаас таалал төгсөж, сэтгүүл зүй болон гадаад харилцааны салбарт хүнд гарз тохиолоо.
Б.Ханддолгор нь 1973 онд Улаанбаатар хотод төрсөн. Нийслэлийн 10 жилийн 48 дугаар дунд сургууль, Монгол Улсын Их Сургууль, БНЭУ-ын Жавахарлал Неругийн их сургуулийг төгссөн. Сэтгүүлч мэргэжилтэй, олон улсын харилцаа, улс төр судлалын магистр, “Түшээ” цолтой дипломат байлаа.
Тэрбээр сэтгүүлчийн мэргэжлээр МУИС-ийг төгсөөд төрийн төв хэвлэл “Ардын эрх” сонинд сурвалжлагчаар ажиллан хөдөлмөрийн гараагаа эхэлсэн. Улмаар 1996-1999 онд “Ардын эрх” сонинд парламентын сурвалжлагч, 1999-2000 онд “Өдрийн сонин”-д, сэтгүүлч, тоймч, 2000-2002 онд улс төр, мэдээллийн “Үг” сонины эрхлэгч, 2002-2004 онд Ардчилсан намын хэвлэл мэдээллийн асуудал хариуцсан нарийн бичгийн дарга, 2004-2006 онд Монголын үндэсний радиогийн дэд захирал, 2007-2009 онд МҮАН-ын Хэвлэл мэдээллийн албаны дарга, 2013-2015 онд ГХЯ-ны Олон талт хамтын ажиллагааны газарт зөвлөх, 2015 оны наймдугаар сараас Дели дэх ЭСЯ-нд зөвлөхөөр ажиллаж байв.
Б.Ханддолгор нь Монголын сэтгүүл зүйд өөрийн байр сууриа эзэлсэн, авьяаслаг сэтгүүлчдийн нэг байсан. Түүний сэтгүүлчийн аналитик сэтгэлгээ, дайчин хурц чанар бүхий сэтгүүлзүйн чадварлаг бүтээлүүдийг нь үнэлэн МЧАСЭ-ийн “Монголын сэтгүүл зүйд үнэтэй хувь нэмэр оруулсан хүн”, “Оны шилдэг сэтгүүлч” өргөмжлөлөөр шагнаж байлаа.
Б.Ханддолгор нь гадаад харилцааны салбарт ажиллаж байхдаа мэдээлэл боловсруулах, нэгтгэн дүгнэх, дүн шинжилгээ хийх, аливааг шинээр хүлээн авч, суралцах чадвартай, салбарынхнаа чадварлаг ажилтнуудын нэг байсан билээ.
Нэгэн үеийн сэтгүүл зүйн салбарын түүчээ болсон авьяаслаг, дайчин сэтгүүлч андын маань гэгээн дүр бидний сэтгэл зүрхэнд хоногшин үлдэх болно..
Ум сайн амгалан болтугай.