Татвар нэмсэн нь ард түмний амьдралыг доройтуулахгүй гэв үү

УИХ дахь МАН-ын бүлгийн дарга Д.Хаянхярваа өчигдөр Валютын сангийн санхүүжилт хэзээ орж ирэхийг лавласан сэтгүүлчийн асуултад хариулахдаа,“Валютын сангийн захирлуудын зөвлөлийн хурал энэ сарын 28-нд болно, эндээс шийдвэр гарна. Япон улсаас манайд 850 сая ам.долларын зээл олгохоор болсон” гээд татвар ард түмний амьдралд нэг их ачаалал болохгүй гэв. Уг зээлийг юуны түрүүнд төсвийн алдагдлыг нөхөхөд ашиглана гэдгийг тэрээр онцлов. Харин Дэлхийн банк, Азийн хөгжлийн банк болон бусад донор орнуудаас орж ирэх хөрөнгө санхүүг хэрхэн ямар зориулалтаар зарцуулахыг яриа хэлэлцээрээр шийдэх аж.

Түүний хэлж буйгаар,татвар нэмснээс шалтгаалан ард түмний нуруун дээр хүнд ачаа үүрүүлчихлээ гэх шүүмжлэл үнэнд нийцэхгүй гэнэ. Учир нь татвар нэмэгдэж байгаа нь олныг хамарсан ачаа болохгүй гэдгийг тэрээр тайлбарлав. Ганцхан Д.Хаянхярваа ч биш Монголын бүх том дарга нар 7 төрлийн татвар ядууст нэг их хүртээлгүй гэж ам бардам хэлж байгаа. Үнэхээр “тэнгэрийн дуу тэрүүгээр өнгөрвөл” сайнсан. Гэхдээ тэр амлалт арай л худлаа шүү. Тухайлбал, ард түмний унадаг “комиссын” машины татвар 5 саяар нэмэгдэж байна. Бензин шатахууны үнэ нэмэгдэнэ. Тэгж нэмэгдэхээр талх хүртэл нэмэгддэг. Байнга нэг хоёр зуун төгрөгөөр нэмэгдэж байдаг хүнс,ногоо,мах, гурилын үнэ дээшээ л “давхина”. Хурааж хуримтлуулсан нь гэртээ багтахаа больсон баячууд хадгаламжнаасаа татвар төлөг,яагаад болохгүй гэж. Тэгвэл сарын орлогоосоо чадан ядан илүүчилж хадгалсан Дорж,Дондог нарын хүмүүс тэрүүнээсээ татвар төлнө гэхээр шударга уу. Татварыг нэмж байж сая нэг юм Валютын сангийн таалалд нийцэх гэж байхад энэ мэтчилэнг ярих хэрэггүй мэт. Гэтэл ард түмний амьдрал дээсэн дөрөөн дээр байгааг яах вэ. Улс орныхоо эрх ашгийг бодоод бүсээ чангалаад татвараа дуугүй төлж болох. Гэхдээ илүү зардлаа танахаас татгалзсан улстөрчдийг уучлана гэхээр хоолой зангираад байх юмаа. Ядахдаа 13 дэд сайдыг “баяртай” гэчихсэн бол ард түмэн төрдөө баярлах байсан. Орон тоо бөглөгч орлогч дарга,төрийн алба хаагчид гэх мэтийг цомхотгосон бол ард түмэн алга таших байсан. Гадаадад суудаг Элчин сайдуудыг хэрэгтэйг нь үлдээж,хэрэггүйг нь татсан бол бас л төрийн ачаа хөнгөрөх байлаа. Энэ мэтчилэн аривч хямгач байхыг эрхэмлэсэн бол…Одоо нэгэнт өнгөрсний араас уйлж орилоод ч уурлаж бухимдаад ч хэрэггүй болсон. Валютын сангийн хөтөлбөр Монголыг минь ивээх болтугай гэж залбираад л чимээгүй болцгооё.

Н.Намуун