Монголын газар шорооноос бурхан гуйсан ч бүү өг гэдгийг УИХ-ын гишүүд санагтун

УИХ-аар хэлэлцэж байгаа Хөрөнгө оруулалтын банкны тухай хуульд эрхэм гишүүд нухацтай, болгоомжтой хандах шаардлагатайг Ерөнхийлөгч Ц.Элбэгдорж анхааруулав. Монгол Улсын аюулгүй байдал, газар нутгийн бүрэн бүтэн байдалд аюул учруулж болохуйц зүйл заалт хуулийн төсөлд орсныг тэрээр сэрэмжлүүлсэн нь уг хуулиар Монголд гадаадын банк орж ирэх эрх зүйн орчин бүрдэж байгаатай холбоотой аж. Гадаадын банк орж ирлээ гэхэд уг этгээд хуулиар дамжуулан Монгол Улсыг орд газар, баялагтай нь банкинд барьцаалах эрх олж авч байгаа юм. Манайд одоо мөрдөж байгаа хуулиар гадаадынханд ийм боломж олгоогүй. Харин батлах гээд байгаа хуулиар Хөрөнгө оруулалтын банкнаас томоохон хэмжээний зээл авсан иргэд, аж ахуйн нэгж авсан зээлээ төлж чадахгүй тохиолдолд барьцаалсан лицензүүд нь хураагдаж улмаар цааш зарагдана. Ийм нөхцөлд газар нутгийн бүрэн бүтэн байдлаа алдах аюул учирч байна гэдгийг Ерөнхийлөгч Ц.Элбэгдорж анхааруулаад “Монголын талаар гадныхан эртнээс хүн нь чухал биш газар нь чухал” гэсэн бодлого баримталж ирснийг Ерөнхийлөгч Ц. Элбэгдорж УИХ-ын гишүүдэд сануулав. Тиймээс уг хуулиас газар нутаг барьцаалахтай холбоотой зүйл заалтыг хасах хэрэгтэй гэж тэрээр мэдэгдсэн юм. “Миний нутгийн газар шорооноос бурхан гуйсан ч бүү өг” гэж сургасан Галдан бошигтын үгийг эрхэм гишүүд маань Хуралдааны танхимдаа томоор бичиж байрлуулах нь өлзийтэй болно.

Н.Дөлгөөнжин