Майн баяраар суулт зарлаж,өлсөж цангахаа амлав

Өнөөдөр дэлхийн хөдөлмөрчдийн эв санааны баярын өдөр. Монголчууд социализмыг барьж байгуулж байхдаа энэ өдөр жанжныхаа талбай дээр уриа цуурайтуулан жагсаж байдагсан. Харин одоо тэнд төрийн бодлогыг эсэргүүцсэн хүмүүс суулт зарлаж,өлсөж цангах тухай ярьж байна.

Сүүлийн үед Монголын хараагүй иргэд төр засагтаа нэлээд гомдож яваагаа ярих болсон. Монголын Хараагүйчүүдийн Үндэсний Холбоо, хараагүй иргэдийн төлөөлөл өнөөдөр өлсгөлөн зарлахаар болсноо мэдэгдлээ. Тус холбооноос өнгөрсөн сарын 24-нд төрийн гурван өндөрлөгт хандан хүргүүлсэн хараагүй хүүхдийн сурч боловсрох эрхтэй холбоотой шаардлагын хариуг энэ сарын 1-ний дотор өгөхийг шаардсан боловч өнөөдрийг хүртэл хариу ирүүлээгүй байна. Тиймээс өлсгөлөн зарлахаар болжээ. Өлсгөлөн өнөөдөр 12.00 цагаас эхлэх бөгөөд хараагүй иргэдийн төлөөллүүд Төрийн ордны баруун талд байрлах “Хэлмэгдэгсдийн хөшөө”-ний дэргэд суулт хийх юм байна. Хараагүй иргэдтэй зэрэгцэн УИХ-ын гишүүн асан Г.Уянга 10 хоног суулт хийнэ хэмээн мэдэгдэв.

Тэрээр өнөөдрөөс эхлэн Сүхбаатарын талбайд сууж эхлэх Тэрээр, “Ерөнхийлөгчийн сонгууль болоход хоёр сарын хугацаа үлдлээ. Хоёр сарын хугацаа бага хугацаа биш. Монгол Улсын Ерөнхийлөгч Ц.Элбэгдорж энэ хугацаанд юу хийхийг харж байна” гээд түүнийг огцруулах хүсэлтэй байгаагаа илэрхийлсэн. Г.Уянга өөрийг нь дэмжиж байгаа иргэдийг төв талбайдаа цуглахыг уриаллаа. Хэрэв 10 хоногийн дотор төв талбайг дүүргэж, 4000 хүн цуглавал, тэмцлийн хурц хэлбэрт шилжинэ гэдгээ тэр хэлэв.

Н.Намуун