МЗХ “Ухаан Нэмье” аяны хүрээнд олон сонирхолтой үйл ажиллагааг зохион байгуулна

МЗХ энэ онд сар бүр тодорхой уриалга дэвшүүлэн залуус руу чиглэсэн олон талт үйл ажиллагааг зохион байгуулж байна. Өнгөрсөн саруудад залууст ухамсартай, зөв бодолтой, эерэг хандлагатай, ирээдүйдээ итгэлтэй, нэгнээ гэсэн сэтгэлтэй байхыг уриалсан байна. Харин энэ сард “Ухаан Нэмье” аяныг зохион байгуулах гэж байна. Аяны хүрээнд олон сонирхолтой үйл ажиллагааг хийхээр төлөвлөөд байгаа юм байна. Тухайлбал Үндэсний мод тарих өдрийг тохиолдуулан байгаль орчноо хайрлан хамгаалахад залуусыг уриалах, идэвхжүүлэх зорилгоор мод тарих өдөрлөгийг зохион байгуулна.

Аялал жуулчлалын улирал эхэлж байгаатай холбогдуулан 5-р сарын 16-ны өдөр МЗХ-ны Залуус танхимд “Та аялалд бэлэн үү” өдөрлөгийг зохион байгуулах юм. Өдөрлөгт уулын спортын ОУХМ Б.Гангаамаа, МУБИС-ийн аялал жуулчлалын багш Д.Батболд, Рафтингийн холбооны П.Алтангэрэл, Монголын шувуу хамгаалах төвийн П.Ганхуяг нар оролцон аяллын туршлагаасаа хуваалцаж, залууст зөвлөгөө, мэдээлэл өгч санал солилцоно.

Өдөрлөгийн хүрээнд 5-р сарын 13-ны өдөр явган аялал, уулын аялалд сонирхолтой залууст зориулан Спортын явган аяллын спортын мастер М.Дархижав, Оргил дугуйн клубийн үүсгэн байгуулагч Х.Наранбаатар нар орох юм. Лекцийг үр дүнтэй болгох үүднээс залуус Богд ууланд практикт суурилан явагдах юм байна.

Мөн 5-р сарын 27-ны өдөр Тэрэлжид шүхрээр үсэрч үзэх хүсэлтэй, хэрхэн үсрэхээ мэдэхгүй байгаа залууст зориулан Монголын шүхрийн спортын нийгэмлэгтэй хамтран лекцийг зохион байгуулах юм. Залуучуудын Аялал жуулчлалын холбооны тэргүүн Э.Хишигбаяр морин аялал хэрхэн хийх вэ, морин аяллаар явахдаа юу анхаарах ёстой вэ зэрэг сэдвийн хүрээнд залуустай ярилцах болно.

Энэ сард өсвөр үе, залуусын бэлгийн болон нөхөн үржихүйн эрүүл мэндийн боловсролыг дээшлүүлэх зорилгоор хэрэгжүүлж буй “Халдваргүй Ирээдүй-Мэдлэгээ хэрэглээ болгоё” төсөл МСҮТ-ийн оюутнуудад сургалт орохоор үргэлжлэх юм.

МЗХ-оос зохион байгуулж буй бүхий л үйл ажиллагаа залуус руу чиглэн хийгдэж байгаа учраас залуусаа идэвхтэй оролцохыг уриалж байна.