Цагдаагийн ажилтан сэжигтнээр толгойгоо бариулах ёстой юу

Дөрөвхөн настай дагавар охиноо хөнөөсөн хэргээр ял эдэлж буй Г.Маралмаа бүсгүй гомдол гаргажээ. Учир нь бүсгүйг байцааж байсан цагдаагийн ажилтан түүнийг хүчиндсэн аж. Г.Маралмаа өргөдөлдөө “Баянзүрх дүүргийн шүүхэд хэргийн материалтай танилцаж байх үед энэ хэрэг болсон” хэмээн дурдаад “Хүлээлгийн өрөөний халуун усны өрөөнд цагдаа, дэслэгч Б-д хүчиндүүлсэн” гэжээ.

Гомдлын дагуу холбогдох албаны хүмүүс очиж камерийн бичлэг, үзлэг зэргийг хийж, гэрчүүдээс мэдүүлэг авсан байна.

Мөн хүчиндсэн гэх цагдаагийн албан хаагч Б-гээс ч тайлбар мэдүүлэг авчээ. Харин Б нь “Хүчиндсэн асуудал байхгүй. Толгой өвдөөд байхаар нь өрөөндөө оруулж толгойгоо л бариулсан” хэмээн мэдүүлсэн байна.

Үүнийг хамт байсан цагдаа ч нотолж байгаа аж. Цагдаа төрийн ажил үүрэг гүйцэтгэж байхдаа хэрэгт шалгагдаж байгаа сэжигтнийг өрөөндөө оруулж ирээд толгойгоо бариулж болдог юм уу. Хэрэг хийсэн хэн ч бай цагдаагийн хэлсэн болгоныг ёсчлон биелүүлж байх уу.

Цагдаагийн толгой өвдөхөд сэжигтэн бариач илээчийн үүрэг гүйцэтгэх ёстой юу. Цагдаагийн байгууллага жижиг гэлтгүй асуудалд нухацтай хандах биз ээ.

Хамгийн харамсалтай нь, цагдаа Б.нь хэргийг нь шалгаж байх хооронд амиа хөнөөсөн аж. Г.Маралмаагийн гомдол цагдаагийн байгууллагын “хөшигний цаана” юу болж байдгийн үзүүр сэжүүр байж ч мэднэ. Юутай ч гомдлын дагуу уг хэргийг Мөрдөн байцаах албаны тусгай субьектын хэлтэст шалгаж байгаа юм байна. Хэдийгээр хийсэн хэрэгтээ ял эдэлж байгаа ч хүний эрх ялтан бүхэнд хамаатай.

Хүний эдлэх ёстой эрхэнд халдахыг хуулиар хориглодог билээ. Хоёр шатны шүүхээс хатуухан “банга” авсан Г.Маралмаа 23 жилийн ялтай. Түүний “нөхөр” Т.Цогтод 20 жилийн хорих ял оноосон.

Н.Дөлгөөнжин